Álemdi ábigerge salǵan lańkestik, ókinishke qaraı, Ystanbulǵa taǵy da jetti. Sonyń saldarynan 8 adam qaza taýyp, 81-i aýyr jaraqat aldy. Túrkııa Prezıdenti Redjep Taııp Erdoǵan muny «terrorıstik shabýyl» dep málimdedi. Qazaqstan basshysy Qasym-Jomart Toqaev jantúrshigerlik lańkestik saldarynan qurban bolǵandar týraly habardy kúızelispen qabyldaǵanyn jetkizip, Túrkııa Prezıdentine kóńil aıtý jedelhatyn joldady.
El basshysy R.Erdoǵan búgin Balıde ótetin G20 sammıtine qatysýy tıis. Jarylys Túrkııa Prezıdentiniń saparǵa shyǵar aldynda boldy. Jolǵa shyqpastan buryn sóılegen sózinde ol shabýyldy jasaǵandar jazalanatynyn jetkizdi. Sondaı-aq tergeýdiń jalǵasyp jatqanyn, biraq alǵashqy málimet terrorlyq áreket ekenin kórsetetinin málimdedi. «Qala gýbernatorynyń bizge bergen alǵashqy aqparaty munyń lańkestik áreket ekenin kórsetedi», dedi R.Erdoǵan.
Ystanbul gýbernatory Alı Ierlıkaıanyń keltirgen málimetterine sáıkes, jarylys jergilikti ýaqytpen saǵat 16:20-da Beıoglý aýdanyndaǵy Istıklal kóshesinde jasalǵan. «Oqıǵa ornyna jedel járdem, qutqarýshylar, qaýipsizdik kúshteri men AFAD brıgadalary dereý jóneltildi. Qurbandar men zardap shekkender bar. Qosymsha aqparat taǵy jarııalanady», dedi Alı Ierlıkaıa Twitter-degi paraqshasynda.
Memlekettik Anadolu aqparat agenttiginiń habarlaýynsha, jarylysty tergeýge bes prokýror taǵaıyndalǵan. Shabýyl bolǵan sátten bastap jelide jarııalanǵan beınelerde úreılengen adamdardyń júgirip, kósheniń ortasynan alystan ot shary kóterilgen kezde jaqyn mańdaǵy dúkenderge jasyrynýǵa tyrysqany kórinedi.
Reuters agenttigi lańkestik árekettiń beınebaqylaý kameralaryna túsip qalǵan sátin jarııalady. Beınejazbalarda adam kóp júretin kóshede ondaǵan jaıaý júrginshi ketip bara jatqanda jarylys bolady. Tútin seıilgende qulaǵan adamdardyń qashýǵa árekettengeni, jerde keminde tórt máıittiń jatqany baıqalady. Al Jazeera arnasynyń Ystanbuldaǵy tilshisi Sınem Koseoǵlý qaza tapqandar arasynda úsh jasar qyz ben onyń ákesi bar ekenin habarlaǵan.
Ystanbuldyń Beıoglý aýdanyndaǵy Istıklal kóshesi týrıster kóp baratyn jer sanalady. Onda kóptegen álemdik brendter, túrli dúkender ornalasqan. Jarylystan keıin jaıaý júrginshiler tezirek ketýge tyrysty. Polısııa kóshelerdi japqan. Kóp uzamaı Istıklaldyń qalǵan bóligi qaıta ashyldy. Biraq dúkender jabylyp qaldy. Al polısııa tikushaqtary shahardy ústinen baqylady.
Ystanbul meri Ekrem Imamoǵlý da oqıǵa ornyna bardy. Jarylys onyń Oppozısııalyq Respýblıkalyq Halyq partııasynyń (CHP) shtab páterinen 200 metr jerde bolǵan.
«Men Istıklal kóshesindegi órt sóndirý bólimshelerinen aqparat aldym. Olar polısııamen kelise otyryp, aýdanda tergeý jumystaryn jalǵastyryp jatyr. Medısına qyzmetkerleri de aıanyp jatqan joq. Qaıtys bolǵandarǵa Allanyń meıirimine bólenip, zardap shekkenderdiń tezirek saýyǵyp ketýin tileımin», dep jazdy ol Twitter-de.
Túrkııa polısııasy jarylysqa qatysy bar degen kúdikpen 46 adamdy tutqyndady. Ishki ister mınıstri Súleıman Soılý jýrnalısterge bergen suhbatynda ustalǵandar arasynda bombany qaldyrǵan adam da bar ekenin málimdedi.
S.Soılý jarylysqa Kúrdistan jumysshy partııasyn (PKK) aıyptady. «Bizdiń baǵalaýymyzsha, lańkestik bul áreketke tapsyrys Sırııanyń soltústigindegi Aın ál-Arab qalasynan kelgen», dedi ol. Atalǵan qalada PKK-nyń shtab páteri ornalasqan dep esepteledi.
Túrkııa bıligi oqıǵaǵa DAISh-tyń (Qazaqstanda tyıym salynǵan terrorıstik uıym) da qatysy bolýy múmkin ekenin joqqa shyǵarmaıdy. Degenmen ázirge shabýylǵa jaýapkershilikti eshbir top óz moınyna alǵan joq.
Qazaqstannyń Syrtqy ister mınıstrliginiń resmı ókili Aıbek Smadııarov jarylystan zardap shekkender arasynda Qazaqstan azamattary joq ekenin málimdedi.
О́z kezeginde Qazaqstannyń Ystanbuldaǵy Bas konsýldyǵy Túrkııadaǵy otandastarymyzdy saq bolýǵa shaqyrdy. Ásirese adamdar kóp jınalatyn jerlerde barynsha saq bolýǵa keńes berdi.
Sondaı-aq Ázerbaıjan, Mysyr, Fransııa, Grekııa, Italııa, Pákistan, Ýkraına, Ulybrıtanııa jáne AQSh sııaqty birneshe memlekettiń basshylary Túrkııaǵa kóńil aıtý jedelhatyn joldady. Grekııa jarylysty aıyptasa, AQSh terrorızmge qarsy turýda NATO-daǵy odaqtasymen ıyq tiresetinin jetkizdi.
«Sizderdiń qaıǵylaryńyzǵa ortaqpyz. Biz terrorızmmen kúreste sizdermen birgemiz», dedi Fransııa prezıdenti Emmanýel Makron túrik halqyna joldaǵan kóńil aıtý jedelhatynda. Ýkraına prezıdenti Volodımır Zelenskıı Twitter-de túrik tilinde: «Dos túrik halqynyń qaıǵysy – bizdiń dertimiz» dep jazdy. Eýropalyq Keńes tóraǵasy Charlz Mıshel de Anadolydaǵy aǵaıynǵa kóńil aıtty.
Jalpy, buǵan deıin Túrkııanyń iri shaharlarynda birneshe ret terrorıstik shabýyl bolǵan-dy. Máselen, 2016 jyly Ystanbuldaǵy fýtbol stadıonynyń syrtynda bomba jarylyp, 38 adam qaza tapty, 155 turǵyn jaralandy. Biraq Túrkııa bul qaıǵynyń da qara bultyn seıiltkendeı edi. Mundaı lańkestik áreketter rýhty túrik halqynyń eńsesin túsirmesi anyq.