Qurlyqtyq hokkeı lıgasyndaǵy (QHL) kelesi kezdesýin astananyń «Barysy» О́fede jergilikti «Salavat Iýlaevpen» ótkizdi.
«Shyǵys» konferensııasynyń týrnır kestesinde ekinshi orynda kele jatqan «Salavat Iýlaev» ótken týrda óz aıdynynda Ombynyń «Avangardyna» býllıtte ese jibergen bolsa, bul joly «Barystan» basym túse almady. Keıingi tórt matchtyń tek bireýinde ǵana jeńiske jetken jerlesterimiz О́fede táýir oıyn kórsetti. Básekeniń alǵashqy kezeńinde esep ashylmasa da, «Barys» hokkeıshileri belsendi oınady.
Úzilisten keıin de qarqynyn joǵaltpaǵan elordalyqtar ekinshi kezeńniń sońǵy mınýtynda gol soǵyp, esepte alǵa shyqty. Kanadalyq qorǵaýshy Djessı Gremnen tamasha pas alǵan Egor Petýhov nysanany dál kózdedi. Úshinshi kezeńde de basymdyqqa ıe bolǵan jerlesterimiz matchtyń sońǵy mınýtynda ekinshi shaıbany soqty. Goldyń avtory – Arkadıı Shestakov. «Barys» osy jeńisinen keıin týrnır kestesinde pleı-off aımaǵyna qaıta oraldy.
Astanalyqtar kelesi kezdesýin búgin syrt aıdynda Ekaterınbýrgtiń «Avtomobılıst» klýbymen ótkizedi.