Syrtqy ister mınıstrligi men Ortalyq saılaý komıssııasy elimizde akkredıttelgen sheteldik dıplomatııalyq korpýstyń ókilderi úshin Qazaqstan Respýblıkasy Prezıdentiniń aldaǵy saılaýyna arnalǵan birlesken brıfıng ótkizdi, dep habarlaıdy Egemen.kz SIM baspasóz qyzmetine silteme jasap.
«Táýelsizdiktiń barlyq jyldary Qazaqstan halqy turaqty, gúldengen jáne ınklıýzıvti qoǵam qurý úshin jumys istedi. Bizdiń demokratııalyq quqyǵymyzdy jalpyhalyqtyq daýys berý arqyly júzege asyrý osy ýaqytqa deıin qol jetkizgen jetistikterimizdi nyǵaıtýǵa kómektesedi jáne odan ári ilgerileýge negiz bolady», dedi Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi.
Ortalyq saılaý komıssııasynyń tóraǵasy Nurlan Ábdirov prezıdent saılaýyn ótkizýge daıyndyq barysy jáne onyń negizgi rásimdik aspektileri týraly aıtyp berdi.
«Ortalyq saılaý komıssııasy óz jumysyn zańǵa qatań sáıkes júrgizedi, ashyqtyq pen jarııa dıalog qaǵıdattarynda áreket etedi. Saılaý naýqany «Qazaqstan Respýblıkasyndaǵy saılaý týraly» qoldanystaǵy Konstıtýsııalyq zańynyń negizinde ótip jatqanyn atap ótý mańyzdy», dedi N. Ábdirov.
Onyń aıtýynsha, el boıynsha saılaýda barlyǵy 10 101 ýchaske jumys isteıdi. Al saılaýshylar tizimine 11 950 485 azamat enedi. Sondaı-aq Ortalyq saılaý komıssııasy daýys berýge, onyń ishinde múmkindigi shekteýli adamdarǵa qajetti jaǵdaılar jasaýǵa erekshe nazar aýdarady.
«Halyqaralyq baıqaýshylardy akkredıtteý keshe aıaqtaldy. Ortalyq saılaý komıssııasy janynan barlyǵy 641 baıqaýshy akkredıttelgen, onyń ishinde EQYU DIAQB, TMD, TMD PAA, UQShU PA, Túrki memleketteri uıymy, TúrkPA, ShYU, IYU baıqaýshylar mıssııalarynyń ókilderi, sondaı-aq 35 shet memlekettiń ókilderi bar», dep atap ótti OSK tóraǵasy.