«QTJ» UK» AQ-da kompanııa basshylyǵynyń sıngapýrlyq PSA International Pte Ltd kompanııasynyń logıstıka jáne sıfrlyq kólik dálizin damytý salasyndaǵy strategııalyq yntymaqtastyq boıynsha ókilderimen kezdesýi ótti.
Taraptar Azııa-Eýropa sıfrlyq saýda dálizin qurý máselelerin talqylady. Bul bastamany iske asyrý Memleket basshysy eldiń tranzıttik áleýetin arttyrý jáne jahandyq logıstıkalyq ekojúıedegi senimdi kólik haby retindegi Qazaqstannyń ımıdjin nyǵaıtý boıynsha qoıǵan mańyzdy mindetin sheshýge múmkindik beredi.
Kezdesýde PSA International Pte Ltd – Crimson Logic enshiles kompanııasy QTJ mamandarymen birlesip ázirlegen biryńǵaı sıfrlyq platforma tanystyryldy. Jańa júıede Calista-AE jetkizý tizbegin basqarý boıynsha sıngapýrlyq onlaın-platformanyń QTJ aqparattyq júıelerimen ıntegrasııalaný múmkindikteri paıdalanyldy.
Sıfrlyq sheshimdi Transkaspıı halyqaralyq kólik baǵdarynda qoldaný josparlanyp otyr. Platforma klıentter úshin sapaly jáne yńǵaıly servıs jasap, halyqaralyq tasymaldaýshylar úshin marshrýttyń tartymdylyǵyn arttyrady. Sıfrlyq format memlekettik organdarmen jáne ekspedıtorlarmen ashyq ózara is-qımyldy qamtamasyz etedi. Tranzıttik júkterdi resimdeý kezinde qaǵaz qujat aınalymyn boldyrmaýdan basqa, júkterdi jetkizý merzimi qysqarady.
PSA International Pte Ltd – 26 elde termınaldary bar álemdegi eń iri port operatorlarynyń biri.