ASTANA. 29 mamyr . Eýrazııalyq ekonomıkalyq odaqtyń qurylǵanyn otandyq taýar óndirýshiler tek qana qoldaýy kerek. Bul týraly Ońtústik Qazaqstan oblysynda óz kásibin dóńgeletip otyrǵan «Barys 2007» JShS dırektory Azat Qarajanov BNews.kz tilshisine bergen suhbatynda aıtty.
Kásipkerdiń oıynsha, elimiz odaqqa múshe bolsa, qazaqstandyq kásipkerlerge Reseı, Belarýstegi kásipkerlermen teńesýine, básekege túsýine múmkindik týady.
«Bul qujatqa tek qana ekonomıkalyq turǵydan qaraǵan durys. Kim qandaı taýar óndiredi, sol kásipkerdiń baǵy shabady. Menińshe, qazaqstandyq kásipkerler básekege túsýge daıyn», − dedi Azat Qarajanov.
Kásipker buǵan qosa odaqqa múshe elder bir erejege baǵynatynyn, bul da kásipkerlerdiń jumysyn jeńildetetinin atap ótti.
«Máselen, bizdiń kásiporyn sheteldiktermen básekege túsýge daıyn. Batys Eýropadan jetkizilgen jabdyqtardy ornattyq. Jumysshylarymyzdyń qarym-qabileti joǵary. Tájirıbesi mol. О́nimderimizdiń sapasy joǵary, baǵasy tıimdi. Sondyqtan da básekeden qoryqpaımyz. Negizi, báseke kásipkerlerdiń ósýine, órleýine alyp barady», − dedi ol.
Esterińizge sala keteıik, Saıram aýdanynyń Tassaı aýylynda ornalasqan «Barys 2007» JShS «Mádına» saýda belgisimen makaron óndirip, elimizdiń barlyq óńirlerine, sondaı-aq Túrkimenstan, Tájikstan, Grýzııa, Aýǵanstan sekildi kóptegen elderge eksportqa jóneltedi.
Onyń kásipornynda Qazaqstan men Orta Azııa aýmaǵynda buryn-sońdy bolmaǵan zamanaýı ıtalıan jabdyqtary ornatylǵan. Avtomattandyrylǵan jeli úzdiksiz rejimde jumys jasap, saǵatyna 3 500 keli makaron ónimderin nemese jylyna 25 myń tonna ónim shyǵarýǵa múmkindik beredi. Fabrıka jeke ınvestısııalar qarajaty esebinen salyndy, jobanyń quny - 10 mıllıon dollar. Kásiporynda 120 adam jumys isteıdi.
Murat Aıtqoja.
Derekkóz: BNews.kz.
Foto: agencyrating.kz.