Almaty - Qazaqstannyń mádenı astanasy sanalady. Munda teatrlar, mýzeıler, kitaphanalar kóp. Almaty Fest, The Spirit of Tengri sııaqty aýqymdy mádenı is-sharalar jıi ótedi. Biraq, taǵy da sol másele, negizgi mádenıet oshaqtary qalanyń «tarıhı ortalyǵynda» shoǵyrlanǵan. Bul týraly Memleket basshysy Almaty qalasynyń jurtshylyǵymen kezdesý barysynda aıtty, dep habarlaıdy Egemen.kz.
Memleket basshysynyń aıtýynsha, qalaǵa týrısterdi tartýǵa mádenıet salasynyń áleýeti jetkilikti.
«Ákimdik qalanyń jańa aýdandarynda zamanaýı mádenı orta qalyptastyrýy kerek. Týrısterdi kóptep tartýǵa mádenıet salasynyń áleýeti jetedi. Mysaly, jaqynda Almatyda Dımashtyń konserti ótkenin jaqsy bilesizder. Oǵan 65 elden 13 myń týrıst keldi. Mádenı is-sharalar qalanyń rýhanı ómirin baıytýǵa, shyǵarmashylyq áleýetin arttyrýǵa tıis», dep qosty Q.Toqaev
Sondaı-aq erekshe kútimdi qajet etetin jandarǵa jan-jaqty qoldaý kórsetilýi tıis ekenin aıtty.
«Almaty – barlyq azamatqa birdeı qoljetimdi ári qolaıly qala bolýy qajet. Erekshe kútimdi qajet etetin jandarǵa jan-jaqty qoldaý kórsetý asa mańyzdy. Olarǵa meılinshe yńǵaıly qoǵamdyq orta qalyptastyrýymyz qajet», dedi el Prezıdenti.
Prezıdenttiń aıtýynsha, Qazaqstanda eshkimniń quqyǵy shektelmeýi kerek. Qazir Almatyda 55 myńdaı múmkindigi shekteýli adam turady. Onyń 13 myńy erkin júrip-tura almaıdy. Olarǵa kedergisiz orta qalyptastyrý qajet. Bul jumys múmkindigi shekteýli jandar ǵana emes, qart kisiler jáne balalar úshin de óte mańyzdy.
«Sondyqtan, ákimdik qaladaǵy áleýmettik nysandardyń bárin osyndaı jandardyń qajettiligine beıimdeýi kerek. Halyqqa qyzmet kórsetý ortalyqtaryn, aýrýhanalar men emhanalardy, bilim berý jáne sport mekemelerin osy talapqa saı keltirý qajet», dedi Q.Toqaev.