Bıyl Qazaqstanda tirkelgen barlyq qylmystyq quqyq buzýshylyqtardyń besten bir bóligi Almatyda jasaldy. Bul týraly Prezıdent Qasym-Jomart Toqaev qala jurtshylyǵymen ótken jıynda aıtty, dep habarlaıdy Egemen.kz.
«Bıyl Qazaqstanda tirkelgen barlyq qylmystyq quqyq buzýshylyqtardyń besten bir bóligi Almatyda jasalǵany anyqtaldy. Olardyń negizgi bóligi urlyq pen alaıaqtyqqa baılanysty boldy. Memlekettiń basty basymdyǵy - azamattardyń qaýipsizdigin qamtamasyz etý, ómirin, densaýlyǵy men múlkin qorǵaý. Sondyqtan qaladaǵy qylmystarǵa tosqaýyl qoıý kerek», dedi Prezıdent kezdesý barysynda.
Qasym-Jomart Toqaev Qazaqstanda polısııanyń servıstik modelin engizýge baǵyttalǵan júıeli reforma júrgizilip jatqanyn eske saldy.
«Alataý aýdanynda júzege asyrylyp jatqan pılottyq joba jaqsy nátıje kórsetýde. Sondyqtan kelesi jyldyń sońyna deıin qalanyń barlyq aýdandarynda polısııanyń segiz servıstik ortalyǵyn ashyp, qoǵamdyq tártipti qamtamasyz etý úshin vedomstvoaralyq toptar qurýdy tapsyramyn. Mundaı qadam polısııa bólimsheleriniń jumys tıimdiligin arttyrýǵa múmkindik beredi», dep atap ótti Memleket basshysy.
Qalada qaýipsizdik deńgeıin arttyrý maqsatynda ákimdikke 2025 jylǵa deıin qala kósheleri men qoǵamdyq keńistikterdi júz paıyz jaryqtandyrýmen qamtamasyz etýi tapsyryldy.