Qazaqstan Respýblıkasy Memlekettik ortalyq mýzeıi Balalar jylyna oraı Almaty qalalyq mektep-ınternattary arasynda ulttyq oıyndar boıynsha «Mýzeı kýbogi» sporttyq týrnırin ótkizdi. Almaty qalasy Bilim basqarmasy qalalyq dene shynyqtyrý jáne sport ortalyǵymen birlesip uıymdastyrylǵan dúbirli dodada tórt top tartysqa tústi.
Asyq atyp, arqan tartysqan, toǵyzqumalaq taqtasyna qarap oılanyp, jer kilemde «bes asyq» oınaǵan balalar beınesi ásem-aq. О́skeleń urpaqtyń oıyndardyń atyna ǵana emes, zatyna da qanyq ekendigi qýantady. Ásirese asyq atýda básekelestik myqty boldy. Birneshe kezeńge sozylǵan oıynda asyq atý jáne arqan tartý boıynsha №17 mektep-ınternat júldeli birinshi oryndy ıelense, toǵyzqumalaq boıynsha №4 mektep-ınternat kósh bastady. Al «bes asyq» oıynynda QО́JBQO KMM-nen kelgen qatysýshy Olesıa Goloborodko top jardy. Atalǵan oıynda tóreshilik jasaǵan Almaty qalasy Asyq atý federasııasynyń ókili Asan Qajıahmetuly oıynnyń formaty men erejeleri naqtylanyp, balalar arasynda tanymaldylyqqa ıe bolyp kele jatqandyǵyn aıtady. Al aǵa býyn ókilderi ózderi «bes tas» ataǵan bul oıynnyń qyraǵylyq pen kórý qabiletin jaqsartatynyn alǵa tartyp, balalyq shaqtaryn eske alysty.
Mýzeıdiń mádenıet jáne bilim bóliminiń jetekshisi Anna Kýshenko: «Ulttyq dástúr men mádenıetti dáripteý – mýzeıdiń basty mindeti. Búgingi saıystyń da maqsaty sol – ulttyq oıyndardy jastar arasynda nasıhattaý. Oıyn, saıys formaty tek sózben túsindirip, sýretten kórsetýge qaraǵanda ulttyq oıyndardy tanytýda tıimdi bolady degen oımen alǵashqy ret ótkizilip otyrǵan «Mýzeı kýbogi» týrnıri endi jyl saıyn dástúrli túrde uıymdastyrylmaq», dedi.
Eske sala keteıik, ulttyq oıyndar Qazaqstannyń mektep baǵdarlamasyna engizilgen. Dene shynyqtyrý páninde oqýshylar «qazaqsha kúres», «toǵyzqumalaq», «asyq atý» sabaqtaryn oqıdy.
ALMATY