Jyl basynan beri Aqtóbe óńirinde esirtki saldarynan 8 adam ajal qushqan. Oblys prokýrorynyń kómekshisi О́.Eshanovtyń habarlaýynsha, ótken jyly dál osyndaı sebeppen qaıtys bolǵandar sany altaý bolǵan eken. Al bıyl esirtkiniń ıneksııalyq artyq dozalanýynan qaıtys bolǵan adamdar sany 25 paıyzǵa ósip otyr.
О́kinishke qaraı, Aqtóbe aımaǵynda esirtkige degen suranys ta, usynys ta azaımaı tur. Talaı jastyń taǵdyryn tyǵyryqqa tirep, eresekterdiń de esin alǵan esirtki óndirisi men aınalymy adamdardyń densaýlyǵyna da úlken áser etip otyr.
Naqty málimetterge súıensek, qazirgi tańda oblystyń narkologııalyq esebinde 1 786 adam nashaqor retinde tirkeýge alynǵan eken. О́tken jyly bul tizimdegiler sany 1 856 bolǵan. Onyń ishinde 117-si áıel bolsa, qara tizimniń qaq ortasynda kámeletke tolmaǵan 2 bala da bar.
О́ńirlik quqyq qorǵaý organdary jyl basynan beri esirtkige baılanysty 306 qylmystyq quqyq buzýshylyq tirkelgenin málimdep otyr. Bul san ótken jylmen salystyrǵanda osy sanattaǵy qylmystardyń 34,8 paıyzǵa óskenin ańǵartady. Tirkelgen qylmystyq istiń ishinde 148-i sotqa joldanǵan.
Aqtóbelik prokýrorlar 12 jaǵdaıda esirtkini nasıhattaý turǵyn úılerdiń qabyrǵalarynda telegramm arnalardyń ataýlaryn beıneleý arqyly júzege asyrylǵanyn habarlady.
Osyǵan oraı esirtki saýdasymen aınalysatyn adamdardy anyqtaý jumystaryna erekshe den qoıylyp otyr. Ásirese ınternettegi jarnamalyq «graffıtı saıttary men messendjerlerdiń logınderi, jazýlarynyń» taralý faktileriniń aldyn alý jáne jolyn kesý boıynsha jumys kúsheıtildi. Qala boıynsha qabyrǵalarda osyndaı 20-dan astam jazba joıylǵan.
Mysaly, jaqynda Aqtóbe qalasyndaǵy Astana aýdanynda esirtki zattaryn ótkizý maqsatynda zańsyz daıyndaýmen aınalysqan qylmystyq top anyqtalyp, olardyń zańsyz is-áreketterin áshkerelegen edi. Bul toptyń quramynda 6 adam bolǵan. Osy aýdannyń polısııa qyzmetkerleri Qylmystyq kodekstiń 297-babynyń 4-bóligi – esirtki, psıhotroptyq zattardy, sol tektesterdi bilim berý uıymdarynda ne kámeletke tolmaǵan adamǵa ótkizý jáne 262-baby – uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý boıynsha sotqa deıingi tergep-tekserý júrgizdi. Sot úkimimen toptyń barlyq múshesine 16 jyldan 17 jylǵa deıingi merzimge bas bostandyǵynan aıyrý jazasy taǵaıyndaldy.