17-18 qarashada astanada Aqparat jáne qoǵamdyq damý mınıstrligi Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııamen birlesip, BUU-Áıelder qurylymynyń tehnıkalyq qoldaý kórsetýimen «Qazaqstan damýynyń jańa satysyndaǵy otbasylyq-demografııalyq jáne genderlik saıasat» atty Halyqaralyq ǵylymı konferensııa ótkizýde, dep habarlaıdy Egemen.kz.
Konferensııa alańy Qazaqstan, Chehııa, Shveısarııa, Úndistan jáne AQSh ǵalymdary men sarapshylaryn, sondaı-aq Parlament depýtattaryn, ortalyq jáne jergilikti atqarýshy organdardyń, ÚEU jáne halyqaralyq uıymdardyń ókilderin biriktirdi.
Konferensııada balalyq shaqtyń qaýipsizdigin qamtamasyz etý, genderlik teńdik, baqytty otbasy modelin qalyptastyrý, demografııalyq damý perspektıvalary, turmystyq zorlyq-zombylyqqa qarsy is-qımyl máseleleri talqylandy. Osy taqyryptardyń árqaısysyna jeke sessııa arnalǵan.
Prezıdent Ákimshiligi Basshysynyń orynbasary, Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva konferensııany ashty.
«Qazaqstan úshin otbasy ınstıtýty memlekettiń mańyzdy tiregi jáne otbasy saıasaty ulttyq damý strategııasynyń ajyramas bóligi. Úkimettiń aldyna jyl saıyn ana men balany qorǵaý, otbasynyń ál-aýqaty salasyndaǵy zańnamalyq jáne ınstıtýsıonaldyq múmkindikterdi keńeıtý boıynsha mindetter qoıylady. Biz úshin genderlik teńdik salasyndaǵy óz tájirıbemizdi basqa elderdiń ǵylymı-saraptamalyq qoǵamdastyǵymen bólisý, sondaı-aq birlesken jobalarǵa qatysý mańyzdy.
Qazirgi aýqymdy álem bizge kóptegen jańa synaqtarmen kún tártibin belgileıdi. Búgingi tańda ǵalymdar men sarapshylardyń qatysýymen otbasynyń tárbıelik róline, demografııalyq damýyna, adamnyń ómir sapasyna áser etetin genderlik teńdikke baılanysty kúrdeli máselelerdi sheshýdiń joldaryn tabý óte mańyzdy», dep Ulttyq komıssııanyń Basshysy ǵalymdar men sarapshylardy kúrdeli máselelerdi sheshý joldaryn tabýǵa shaqyrdy.
Konferensııa aıasynda Qazaqstannyń sońǵy úsh jyldaǵy otbasylyq jáne genderlik saıasat salalarynyń tájirıbeleri usynyldy.
Atap aıtqanda, bizdiń elimizde Ál-aýqat ındeksi ázirlendi. Mekteptegi psıhologııalyq qyzmetterdiń biryńǵaı erejeleri jumys isteıdi. О́ńirlerde bala quqyqtary jónindegi ýákilder taǵaıyndaldy.
Qazaqstan Respýblıkasynda otbasylyq jáne genderlik saıasatty damytýdyń 2030 jylǵa deıingi tujyrymdamasy ózektendirildi. Nátıjesinde turmystyq zorlyq-zombylyqtyń aldyn alý jáne áıelderdiń rólin qamtamasyz etý jónindegi normatıvtik baza aıtarlyqtaı nyǵaıtyldy.
Memlekettik otbasylyq saıasatty iske asyrý, otbasylyq saıasat salasyndaǵy tendensııalarǵa monıtorıng pen júıeli taldaýdy júzege asyrý úshin Úkimettiń jaýapkershiligi arttyryldy. Tıisti fýnksııalar Aqparat jáne qoǵamdyq damý mınıstrliginiń beıindik komıtetine berildi.
Memlekettik otbasylyq saıasatty qalyptastyrý men taldaýdyń ınstıtýsıonaldyq negizi damýda. Otbasy ınstıtýtyn zertteý ortalyǵy quryldy.
«Qazaqstandyq otbasylar», «Otbasylyq-turmystyq zorlyq-zombylyqqa qarsy is-qımyl týraly» ulttyq baıandamalar únemi jarııalanyp turady. Halyqaralyq uıymdardyń qoldaýymen ulttyq zertteýler kesheni júrgizilýde.
Osy jyly Qazaqstan Dúnıejúzilik ekonomıkalyq forýmnyń genderlik teńdik boıynsha kórsetkishterin jaqsartyp, 80-shi orynnan (2021 jyl) 65-shi orynǵa (2022 jyl) deıin kóterilgendigin sarapshylar atap ótti.
Konferensııa qorytyndysy boıynsha ǵylymı negizdelgen saraptamalyq taldaý ázirlenedi. Ol Úkimet pen jergilikti basqarý organdarynyń qurylymdaryna jetkiziledi.