Astana qalasynyń ákimi Altaı Kólginov Instagram paraqshasynda sport nysandarynyń qurylysy men sol jaǵalaýdan salynatyn taǵy bir Oqýshylar saraıy týraly málim etti, dep habarlaıdy Egemen.kz.
- Elordada balalar men qala turǵyndaryna arnalǵan birqatar sport jáne demalys ortalyǵyn salyp jatyrmyz. Mysaly Almaty aýdanynda («Qazaqstan» sport saraıy janynda) jeke ınvestısııalar esebinen kópfýnksıonaldy balalar men jasóspirimderge arnalǵan sport ortalyǵynyń qurylysy júrip jatyr. Sport ortalyǵynyń bazasynda fýtbol alańdary, sol sııaqty ústel tennısine, dzıýdoǵa, paradzıýdoǵa, horeografııaǵa jáne t.b. arnalǵan zaldar bolady, - dep jazdy elorda ákimi.
Sondaı-aq atalmysh kópfýnksıonaldy sport ortalyǵynyń bazasynda sportshylardy ońaltýǵa arnalǵan dárigerlik-dene shynyqtyrý dıspanseri bolady.
Anyqtalǵandaı, jeke ınvestısııalar somasy - 5,5 mlrd teńge. Sport ortalyǵyn 2023 jyly ashý josparlanyp otyr.
- Sol sııaqty qalada jeke ınvestısııalar esebinen ústel tennısi ortalyǵyn («Alaý» muz saraıynyń janynda) ashamyz. Sonymen qatar qalany aralaý barysynda jańa Oqýshylar saraıynyń (Esil aýdany, Turan dańǵyly) qurylysymen tanystym. Oqýshylar saraıynyń qurylysy da jeke ınvestısııalar esebinen júrip jatyr. Oqýshylar saraıynyń jalpy aýdany shamamen 6,5 myń sharshy metrdi quraıdy. Onyń bazasynda basseın, sol sııaqty gımnastıka, sporttyq-bal bıleri zaldaryn, shahmat, robototehnıka jáne IT-baǵdarlamalaý kabınetterin jáne t.b. ashý josparlanyp otyr. Oń jaǵalaýda Oqýshylar saraıy bar. Qala turǵyndarynyń ótinishi boıynsha sol jaǵalaýda Oqýshylar saraıyna arnalǵan oryn bólindi. 2023 jyly Oqýshylar saraıyn ashýdy josparlap otyrmyz, - dep jazdy Kólginov.
Qala ákiminiń aıtýynsha, boks, jekpe-jek óneri ortalyqtary, jekpe-jek zaly, sportshylarǵa arnalǵan medısınalyq ortalyq ashyldy. «Jastar» saraıynda, «Tolqyn» SK jáne t.b. jóndeý jumysy júrgizildi. «Qazaqstan» sport kesheninde qaıta qurý jáne jańǵyrtý jumysy júrip jatyr. «О́ndiris» jáne «Kóktal-2» eldi mekenderinde dene shynyqtyrý-saýyqtyrý keshenderi ashyldy. Olarda sporttyń 10 túri boıynsha 1 myńǵa jýyq bala jattyǵady.
- Qala turǵyndarynyń sportpen shuǵyldanyp, bos ýaqytyn paıdaly ótkize alýy úshin sport jáne demalys ortalyqtarynyń jelisin ary qaraı da keńeıtetin bolamyz. Sport ortalyqtary buqaralyq sportty damytýǵa jáne balalar men jasóspirimder sportyna qoldaý kórsetýge múmkindik beredi, - dep jazdy elorda ákimi.