Arnaıy ekonomıkalyq aımaqqa kelgen ınvestısııanyń ıgiligin kórer kúndi kútkeli kóp jyl. Infraqurylymy saı aımaqtar ınvestısııa quıýǵa yqylastylardy jatsynǵan joq. Suraǵan ornyn berip, ekonomıkaǵa úles qosatyn jobalarǵa esigin aıqara ashqaly da biraz ýaqyt boldy. Qaraǵandydaǵy «Saryarqa» arnaıy ekonomıkalyq aımaǵynda iske asýǵa tıis sondaı jobanyń biri – «Sillumin of Qazaqstan» JShS-nyń alıýmınıı jáne bımetall radıatorlar óndirisi.
Joba jetekshisi Nursultan Jumabektiń aıtýynsha, zaýyt 2022-2024 jyldar aralyǵynda boı kóteredi. Qazirgi tańda jerge qatysty jumystar bastalǵan. Iаǵnı zaýyt salýdyń alǵashqy qadamdary jasalǵan. Jobaǵa sáıkes zaýyt qurylysy úsh kezeńnen turady. Onyń birinshi kezeńi 2024 jyldarǵa mejelengen eken. Buıyrsa, 2024 jyldyń aqpanynda zaýyt ashylady degen jospar bar. Odan keıingi eki kezeńde zaýyttyń qýatyn arttyrýǵa negizdelgen óndiristi ulǵaıtý kózdeledi. Ol da kezeń-kezeńimen iske aspaq.
– Jobanyń quny 17 mlrd 710 mln teńge shamasynda. Birinshi kezeńde «V Manegment» kompanııasynyń qarajaty 1,7 mlrd teńge bolsa, 14,1 mlrd teńge nesıege alynady. Nesıeniń belgili bir paıyzy «Damý» qory arqyly sýbsıdııalanady. Jobanyń ózin-ózi aqtaý merzimi – 6 jyl. Joba iske qosylǵanda 183 adam jumysqa alynady. Qýattylyǵy – birinshi kezeńde jylyna 3,3 mln seksııa, – deıdi N.Jumabek.
Kompanııa basshysy birinshi kezekte ákimshilik-turmystyq keshen, óndiris, ınjenerlik júıeler salynatynyn aıtady. Zaýyt jergilikti turǵyndardy jumyspen qamtıtyn bolady.
Mundaǵy alıýmınıı jáne bımetaldy radıatorlar shyǵarý óndirisi birneshe sıkldi. Iаǵnı alıýmınııdi balqytyp, quıýdan bastap, jınap, boıap, qaptap shyǵarýǵa deıingi barlyq óndiris zaýytta júzege asyrylady. Qysymmen quıý tehnologııasy qoldanylady.
– Ýtılızasııaǵa túsken kólikterdegi alıýmınııdi qaıta qorytyp, balqytý arqyly radıator quıylady. Odan soń jınaqtalyp, boıalyp, qaptalyp, naryqqa shyǵarǵanǵa deıingi prosestiń bári zaýyt ishinde atqarylady, – deıdi kompanııa basshysy.
Osylaısha, óndiristegi ónim shyǵarý birneshe satyny qamtıdy. Úsh kezeń tolyq iske asqanda jylyna 8 mln seksııa radıator naryqqa shyǵady. Joba ekonomıkaǵa shıkizattyq emes eksportty damytýǵa úles qosýdy ditteıdi. Sol arqyly eldiń ónerkásip áleýetinde jańa klaster qurýdy maqsat etedi. Kompanııa basshylyǵynyń málimdeýinshe, zaýyttyń «Saryarqa» arnaıy ekonomıkalyq aımaǵynda alǵan jer teliminiń aýqymy – 6 gektar. Zaýyttyń úsh kezeńinde de qurylys jumysyna tartylatyn adam sany júzge jýyq.
– Zaýyt jumysyna negizinen jergilikti turǵyndar tartylady. Zaýyt tarapynan oqytyp, mamandardy daıyndaýǵa den qoıamyz. Keı mamandar úıretý úshin Reseıden keledi, – deıdi N.Jumabek.
Jalpy, qazir alıýmınıı radıatorlar jylý júıesinde keńinen qoldanylyp júr. Bulardyń ózge radıatorlarǵa qaraǵanda birqatar artyqshylyǵy bar. Aıtalyq, birinshiden alıýmınıı radıatorlar basqalarǵa qaraǵanda baǵasy jaǵynan sál arzandaý túsetini jasyryn emes. Sonymen qatar jylý bólýinde ózgelerden ozyqtyǵy taǵy bar. Oǵan qosa, salmaǵy jeńil. Derekterge súıensek, onyń bir seksııasynyń salmaǵy 1,5 kg kóleminde. Sonyń ózinde 15 seksııaly uzyn batareıa bar-joǵy 15 kılo bolady. Bul óz kezeginde tasymaldaý men montajdaýda qıyndyq týdyrmaıdy. Al radıatordaǵy ystyq sýdyń gradýsyn 130 gradýsqa deıin kóterýge múmkindik beredi. Alıýmınııdiń jylý ótkizgishtigi óte joǵary. Bir seksııanyń 150-200 Vt jylý energııasyn ótkize alatyn múmkindigi bar. Sonymen birge estetıkalyq beınesi, sapaly boıalýy da básin joǵary qylady.
Qaraǵandy oblysy