Eýrazııalyq ekonomıkalyq odaqtyń qurylýy jónindegi kelisimge qol qoıylýy Batystyń eýrazııalyq ıntegrasııa jónindegi stereotıpti kózqarasyna berilgen soqqy bolyp tabylady. Bul týraly Reseı Memlekettik dýmasy halyqaralyq ister jónindegi komıtetiniń tóraǵasy Alekseı Pýshkovtyń sózderine silteme jasaǵan RIA «Novostı» habarlady.
«Bizdiń túsingenimizdeı, osy úderis alǵash bastalǵan kezde – onda Reseı belsendi qımyl kórsete bastaǵan tusta onyń bolashaǵyna kúmánmen qarap, keketýshilikte shek bolǵan joq. Olardyń basym bóligi Batystan tarap jatty. Bizge ıntegrasııaǵa tek Batys elderi ǵana qabiletti degen uǵymdy tyqpalap baqty», - dedi depýtat.
Pýshkovtyń pikirinshe, atalmysh kelisimge qol qoıylýy Reseı, Qazaqstan jáne Belarýs arasyndaǵy ıntegrasııalyq prosesterdiń tabysty júrip jatqanyn da kórsetedi.
Budan buryn málim etilgendeı, Reseı, Belarýs jáne Qazaqstan memleketteriniń Prezıdentteri keshe, beısenbi kúni Astanada 2015 jyldyń 1 qańtarynan bastap iske kirisetin EAEO (Eýrazııalyq ekonomıkalyq odaq) qurý jónindegi kelisimge qol qoıdy. Osylaısha, 170 mıllıon adamy bar TMD keńistiginde damýdyń jańa qýatty ekonomıkalyq ortalyǵyna aınalatyn asa iri jalpy naryq qalyptastyrý aıaqtalyp keledi.
«Eske sala keteıin, Eýropada qazirgi zamanǵy Eýropalyq odaqtyń qurylýy úshin tabany kúrekteı 40 jyl ýaqyt kerek boldy. Al Eýrazııalyq ekonomıkalyq odaqtyń paıda bolýy úshin odan áldeneshe ese az ýaqyt ketip otyr. Endi sońǵy odaqty álemdik tartylys ortalyǵy bolady dep te kútýge bolady», - dep qorytty depýtat.
Murat Aıtqoja.
Derekkóz: RIA «Novostı».
Foto: RIA «Novostı». Aleksandr Natrýskın.