Aıta keteıik, osy kezge deıin bul 2022 jylǵy Aq Olımpıadany ótkizýge 19 qala qushtarlyq tanytyp, arnaıy tirkelgen bolatyn. Biraq ýaqyt óte kele, sol saptan óz erkimen shyǵyp qalýshylar qatary kóbeıe berdi. Qazirge deıin osylaısha 14 qala bul básekeni jalǵastyrýdan bas tartyp úlgeripti. Muny táýelsiz sarapshylar sońǵy kezderi Olımpıada ótkizýden eshkimniń paıda taba almaı kele jatqanymen baılanystyrady.
Al Almatyny osy sharaǵa qosyp otyrǵan jaýapty tulǵalar bul pikirmen kelisip otyrǵan joq. Degenmen, 4 jylda bir kelip, aıdaı álemdi aqar-shaqar etetin alaman jarys ótken eldiń qaǵanaǵy qarq bolyp qalady degen uǵym shynynda birtindep kelmeske ketip bara jatyr. Muny bıyl ótken Sochı Olımpıadasynyń qorytyndysy tipti, aıqyn kórsetip berdi. Qazir iri jarystar, kerisinshe, qazynanyń qorjynyn ortaıtyp ketedi degen uǵym qalyptasýda.
Qazir Almatyny qosqanda, joǵarydaǵy tizimde 5 qala ǵana qaldy. Al bizdiń Olımpıada komıteti 2022 jyly Almaty qysqy dodany ótkizse, 50 myń jumys orny ashylatynyn, tipten, qazir qala Olımpıadaǵa 62 paıyzǵa daıyn ekenin málimdep otyr. Bul kórsetkish 2017 jylǵy Ýnıversıadadan soń 80 paıyzǵa jetedi eken.
Almatyda ótýi múmkin aq Olımpıadanyń bıýdjeti de osal emes. Biraq Ulttyq Olımpıada komıteti esh nárseden qysylyp otyrǵan joq. Bar-joǵy eki sport keshenin salsaq, HHIV Qysqy oıyndardy ótkizýge saqadaı saımyz deıdi olar. Endi 8 jyldan keıin ótýge tıis osy dúbirli dodanyń mekeni kelesi jyly jazda Malaızııada sheshiledi.
Rýslan IGILIK.