Toǵyz joldyń torabynda ornalasqan Shý óńirine kelip-ketetin meımandar az emes. Aýdan ortalyǵyna at basyn burǵan azamattar syrqattanǵan jaǵdaıda jergilikti ortalyq aýrýhanaǵa qaıyrylyp jatady. Mundaıda mamandar qoldan kelgen kómegin aıamaıdy.
Aýdandyq ortalyq aýrýhananyń bas dárigeri Jaıdar Áıtishevtiń aıtýynsha, óńir boıynsha 56 334 adam tirkeýde tur. Al shalǵaı aýyldarda turatyn qarasha halyqty qoljetimdi medısınalyq qyzmetpen qamtamasyz etý úshin jyljymaly medısınalyq keshen aýyldarǵa jıi shyǵady.
«Bizdiń JMK ýltradybysty apparat, rentgen apparaty, gınekologııalyq kreslo, oftalmoskop, otoskop, kóz tonometri, bıohımııalyq analızator, elektrokardıograf, glıýkometr, koagýlometr, pýlsoksımetrmen jadbyqtalǵan. Kestege sáıkes aýyldarǵa tis dárigeri, kóz dárigeri, akýsher-gınekolog, hırýrg, terapevt jáne ýltradybysty qurylǵy mamandary baryp turady. 2022 jyldyń 10 aıynda JMK arqyly medısınalyq kómekpen 28 081 adam qamtyldy, onyń ishinde 15 544-i – balalar. Sondaı-aq 8 810 dıagnostıkalyq zertteýler jasaldy. Nátıjesinde, 1 418 naýqas anyqtaldy. Olardyń 125-iniń qan aınalymy júıesinde másele týyndasa, 11 azamattan qant dıabeti anyqtalǵan. Qalǵany – basqa aýrýlar. Jalpy, 163 adam dıspanserlik esepke alyndy», deıdi J.Áıtishev.
Búgingi tańda jergilikti turǵyndar 30 densaýlyq saqtaý nysanyna qaıyryla alady. Aýdannyń medısına salasynda 150 tósektik ortalyq aýrýhana, 250 kelýshige arnalǵan konsýltatıvtik-dıagnostıkalyq emhana, otbasylyq densaýlyq ortalyǵy, 14 otbasylyq dárigerlik ambýlatorııa, sondaı-aq 6 feldsherlik-akýsherlik jáne 7 medısınalyq pýnkt bar.
J.Áıtishevtiń aıtýynsha, osy jyly aýdandyq emdeý mekemeleriniń shtaty jańadan 10 dárigermen tolyqqan eken. «Dıplommen – aýylǵa!» memlekettik baǵdarlamasy aıasynda aýdanda 6 jas maman eńbek etýde.
Jambyl oblysy,
Shý aýdany