Túrkistan qalasyndaǵy «Farab» ámbebap ǵylymı kitaphanasynyń konsert zalynda oblystyq «Babadan qalǵan asyl sóz» jas termeshiler baıqaýy ótti. Oblystyq Mádenıet basqarmasy men oblystyq Mádenıet jáne halyq shyǵarmashylyǵy ortalyǵy bıylǵy «Balalar jylyna» oraı jyl basynan beri «Bal tańdaı» oblystyq balalar óner festıvalin uıymdastyryp keledi.
Jyr dodasyn oblystyq Mádenıet jáne halyq shyǵarmashylyǵy ortalyǵynyń dırektory Meıirjan Alıakbarov ashyp, is-sharanyń mańyzdylyǵyna toqtady. Osyndaı saıystardy uıymdastyrý arqyly jas talant ıeleri anyqtalatynyn jetkizip, qatysýshylarǵa sáttilik tiledi. Qazaq óneriniń jetistikterin nasıhattap, onyń órkendeýine yqpal jasaý, balalar arasyndaǵy terme ónerin damytý, jas daryndy termeshilerdi anyqtap, olarǵa qoldaý kórsetý, sonymen qatar, ońtústik óńirde qalyptasqan ózindik dástúrli óner mektebin kópshilikke nasıhattaý maqsatyndaǵy «Babadan qalǵan asyl sóz» oblystyq jas termeshiler baıqaýyna 8-16 jas aralyǵyndaǵy 14 úmitker qatysyp, óner kórsetti. Qatysýshylar ereje boıynsha eki shyǵarma, ıaǵnı ońtústiktiń maqamynan bir terme jáne erkin taqyrypta bir terme oryndady.
Qazylar alqasynyń sheshimimen bas júlde Túrkistan qalasynyń ónerpazy Berdaly Orynbasarǵa buıyrdy. Al Otyrar aýdanynan Joldybaı Erzat I oryn ıegeri, Saıram aýdanynan Nyshanbaı Sultanmuhamed pen Tólebı aýdanynan Murat Nurǵısa II oryn ıegeri, Arys qalasynan Abdrahman Arman men Túrkistan qalasynan Inabat Ospan III oryn ıegeri atansa, oblystyq mádenıet jáne halyq shyǵarmashylyǵy ortalyǵynyń arnaıy júldesi Túrkistan qalasynan Ásel Arabdınge, Maılyqoja Sultanqoja atyndaǵy arnaıy júlde túrkistandyq Asylzat Meralyǵa buıyrdy. Jeńimpazdarǵa arnaıy statýetka men dıplom jáne qarjylaı syılyq tabys etildi.
TÚRKISTAN