Qatardyń bes qalasynda ótip jatqan fýtboldan álem chempıonatynyń ekinshi kúninde birinshiliktiń basty favorıtteri upaıdan shashaý shyǵarǵan joq. «V» tobynyń alǵashqy týrynda Anglııa Irandy iri eseppen jeńse, «A» tobynda baq synaıtyn Nıderland Senegaldy súrindirdi. Al AQSh pen Ýels arasyndaǵy kezdesýde jeńimpaz komanda anyqtalmady.
40 myń jankúıerge arnap salynǵan Dohadaǵy «Halıfa» stadıonyndaǵy Anglııa men Iran arasyndaǵy matchta osy álem chempıonatyndaǵy alǵashqy eń iri esep tirkeldi. Segiz gol soǵylǵan básekede aǵylshyndar Iran quramasyn 6:2 esebimen tize búktirdi. Garet Saýtgeıt jetekshilik etetin brıtanııalyqtar match taǵdyryn birinshi taımnyń sońǵy 11 mınýtynda sheship tastady. Kezdesýdiń birinshi golyn chempıonattyń jáne Anglııa quramasynyń eń jas oıynshylarynyń biri Djýd Bellıngem soqty. Bul 19 jastaǵy fýtbolshynyń ulttyq qurama sapyndaǵy alǵashqy goly boldy. Sondaı-aq ol Anglııa sapynda álem chempıonattary tarıhynda gol soqqan eń jas ekinshi oıynshy atandy. Birinshisi – áıgili shabýylshy Maıkl Oýen (18 jas). Taım sońyna qaraı Býkaıo Saka men Rahım Strelıng bir márteden kózge tústi.
Ekinshi taımda Saka dýbldiń avtory atanyp, esepti 4:0-ge jetkizse, 90 mınýtqa deıin aǵylshyndar sapynan Markýs Reshford pen Djek Grılısh óz enshilerine bir goldan jazdy. Al Iran quramasynan Mehdı Taremı eki márte dáldik tanytty. Taremı 65-mınýtta oıyn jaǵdaıynda gol soqsa, 90+13-mınýtta penaltıdi sátti oryndady. Osy matchqa tórelik jasaǵan brazılııalyq tóreshi Rafael Klaýs birinshi taımǵa qosymsha – 14, ekinshi taımǵa 10 mınýt qosyp, álem birinshiliginiń rekordyn ornatty. Sóıtip, bul match 117 mınýtqa sozyldy.
Ál-Týmama qalasynyń atymen atalatyn stadıonda ótken Senegal – Nıderland quramalarynyń arasyndaǵy match teń dárejede ótkenimen, eýropalyqtar sońǵy mınýttarda jeńisti julyp áketti. Senegaldyń bas juldyzy – Sadıo Maneniń álem chempıonatyna qatysa almaıtyny, match barysynda negizgi quramnyń oıynshylary Abdý Dıallo men Sheıhý Kýıateniń jaraqat alyp qalýy komandalastaryna keri áserin tıgizgeni anyq.
80 mınýt boıy Nıderlandtyń shabýylyna toıtarys berip, ara-arasynda ózderi de qaýipti sátterdi uıymdastyryp júrgen senegaldyqtar 84-mınýtta óz qaqpalaryna gol ótkizip aldy. Áýelete asyrǵan dopqa qaqpashy Edýar Mendıden buryn jetken Nıderland shabýylshysy Kodı Gakpo kezdesýdiń esebin ashsa, tóreshi tarapynan qosylǵan segiz mınýttyń sońǵysynda Devı Klassen quramasynyń jeńisin naqtylaı tústi – 2:0.
«V» tobynyń ekinshi matchynda AQSh pen Ýels quramalary birinshi týrda upaı bólisýge májbúr boldy. Irgetasy 2001 jyly qalanǵan Ál-Raııan qalasyndaǵy «Ahmed bın Álı» stadıonyndaǵy tartysty báseke 1:1 esebimen teń aıaqtaldy. Eki qurama úshin de bul matchtaǵy basty maqsat – alǵashqy týrda jeńilmeý bolatyn. Ásirese 1958 jyldan keıin álem chempıonatyna alǵash ret qatysyp jatqan Ýels quramasyna jeńilistiń quny qymbatqa túsýi múmkin edi. Degenmen matchtaǵy esepti birinshi bolyp mýndıalǵa muhıttyń arǵy betinen kelgen AQSh fýtbolshylary ashty. 36-mınýtta Krıstıan Pýlıshıch áriptesi Tımotı Veanyń tamasha gol soǵýyna múmkindik jasap berdi. Vea – 1995 jylǵy «Altyn doptyń» ıegeri atanǵan lıberııalyq fýtbolshy Djordj Veanyń uly. Qazirgi tańda Djordj Lıberııanyń prezıdenti.
Match boıy esepti teńestirýge tyrysqan Ýels fýtbolshylary tek 82-mınýtta ǵana óz degenderine jetti. Amerıkalyq qorǵaýshy óz aıyp alańynda oıyn tártibin buzǵany úshin tóreshi AQSh qaqpasyna penaltı belgiledi. Bul – álem chempıonatynyń alǵashqy tórt matchyndaǵy úshinshi penaltı. 11 metrlik núktege jaqyndaǵan Garet Beıl aıyp dobyn múltiksiz oryndap, tarazy basyn teńestirdi. Osylaısha, Beıl óziniń jáne Ýels quramasynyń 1958 jyldan keıingi álem chempıonatyndaǵy birinshi golyn soqty.