Tótenshe jaǵdaılar mınıstri Iýrıı Ilın Lenın atyndaǵy shahtada bolǵan jarylystyń sebebin aıtty, dep habarlaıdy Egemen.kz.
«Shahtadaǵy apat D6 arnaıy aǵyzý qabatyn ashý kezinde buryn burǵylanǵan drenajdyq uńǵymalardan gaz ben kómir shańynyń kóbeıýine baılanysty kenetten bolǵan gaz-dınamıkalyq qubylys saldarynan oryn aldy. Negizgi sebep - shańmen birge metannyń kóp bólinýi jáne tutanýǵa ákelgen nátıje burǵylaý qondyrǵysyndaǵy №79 pıket aımaǵynda burǵylaý shtangasynyń metall bekitkishterdiń elementterine úıkelý kezinde ushqynnyń paıda bolýy bold», dedi mınıstr.
Iýrıı Ilın birqatar zańbuzýshylyq anyqtalǵanyn, sonyń ishinde jumystyń qanaǵattanarlyqsyz uıymdastyrylǵanyn, ınjenerlik-tehnıkalyq personal tarapynan tıisti baqylaýdyń joqtyǵynan bolǵanyn atap ótti.
Lenın atyndaǵy shahtadaǵy apatqa kináli 26 sheneýnik, onyń ishinde basshylyq qyzmette júrgen eki sheteldik azamat anyqtaldy.
Buǵan deıin habarlaǵanymyzdaı, 3 qarasha kúni saǵat 03:00-de «ArselorMıttal Temirtaý» AQ kómir departamentine qarasty Lenın atyndaǵy shahtada apat boldy. Apat kezinde jer astynda 106 adam bolǵan. 101 adam evakýasııalandy, bes adam qaza tapty, tórt adam jaraqat aldy.
QR Qylmystyq kodeksiniń 277-babynyń 3-bóligi «Taý-ken jumystaryn nemese qurylys jumystaryn júrgizý kezinde qaýipsizdik erejelerin buzý» boıynsha qylmystyq is qozǵaldy. Keıin «ArselorMıttal Temirtaý» AQ kómir departamentiniń dırektory Arman Qalyqov Lenın atyndaǵy shahtadaǵy apattyń sebebin atady. Onyń aıtýynsha, gaz drenajdyq uńǵymalardy burǵylaý kezinde metannyń kenetten bólinýi oryn alǵan.