Jýyrda oqyrmandarǵa qyzmet kórsetý bóliminiń uıymdastyrýymen «Ymyrttaǵy kitaphana» dástúrli áleýmettik-mádenı is-sharasy aıasynda 2021 jyly ashylǵan adaldyq, parasattylyq, ádildik qaǵıdattaryn qalyptastyrýǵa, qoǵamda ulttyq mádenıet pen rýhanı qundylyqtardy ilgeriletýge baǵyttalǵan «Parasat joly» ortalyǵynyń jáne «Elmura» ulttyq-tanymdyq klýbynyń belsendi músheleri jastardyń boıyna adamgershilik pen shynshyldyqty qalyptastyryp, rýhanı baılyq pen ulttyq qasıetterdi sińirý maqsatynda «Adaldyq – ardyń ıesi» atty kitaphanalyq jýrfıks ótkizdi.
Is-sharany «Aqtóbe – adaldyq alańy» jobalyq keńesiniń basshysy Qýanysh Serikjanov ashyp berdi. Ol óz sózinde balany adaldyqqa tárbıeleý adal eńbekke, ádeptilikke úıretýden bastalatynyn aıta kele, adaldyqty boıyna darytqan adam ony qasıetim dep sanap, ózine de, ortasyna da nuqsan keletin esh nárse istemeıtinin atap kórsetti. Jastarǵa tárbıe – qoǵam men jeke tulǵanyń araqatynasyn qamtamasyz etetin basty júıe ekenine nazar aýdardy.
Kóne túrkilik jádigerlerden bastaý alyp, jyraýlar jyry arqyly kórkemdik bıikke kóterilgen baıyrǵy poezııamyz týdyrǵan rýhty jyrlardan nár alǵan ádebıettiń jańa býyny, kitaphanamyzdyń oqyrmandary Dına Amangeldına men Nurserik Qudabaı atalǵan is-sharaǵa jyrdan shashý shashsa, oblystyq Tahaýı Ahtanov atyndaǵy dramalyq teatrdyń ártisteri Meıram Habıbollanyń jetekshiligimen Aıymnur Sándibaıqyzy, Fatıma Berdibekova, Ádilet Amanjolovtyń beıneleýinde «Hanshaıym» ımmersıvti spektaklin usynyp, is-sharanyń áserli ótýine óz úlesterin qosty.
El erteńi – jastarǵa arnalǵan quqyqtyq jáne azamattyq tárbıe týrasyndaǵy is-sharany kitaphana dırektory Sulýshash Hakımova qorytyndylap, qatysýshylarǵa alǵysyn bildirdi.
Gúlzada BEISOVA,
S.Báıishev atyndaǵy oblystyq ámbebap ǵylymı kitaphana qyzmetkeri
AQTО́BE