Ýnıversıtet

«Egemen Qazaqstan» gazetiniń aqparat ortalyǵyn ashty

Bul kúnderi elimizdegi irgeli bilim ordasy ál-Farabı atyndaǵy Qazaq Ulttyq ýnı­versıteti 80 jyldyǵyn atap ótýde. Osyǵan oraı aýqymdy kezeńdi artqa tastaǵan baıyrǵy qarashańyraqta aıtýly oqıǵalar legi júrip jatyr. Sonyń biri – elimizdiń bas gaze­tiniń bıyl atap ótetin 95 jyldyǵy men ýnıversıtettiń 80 jyldyq mereıtoıyna oraı uıymdastyrylǵan «Egemen Qazaqstan» – el gazeti» atty is-shara. Osy arada aıta ketý kerek, bul kúnde BAQ-tyń beldi ókilderi, elge tanylǵan jýrnalısterdiń basym bóligi QazUÝ túlekteri bolyp tabylady. Sondyqtan da gazetimizdiń ókilderi keshegi stýdenttik shaq­tyń kýási bolǵan ulttyq ýnıver­sıtette ótken kezdesýge taǵzym ete barýy zańdylyq edi. Osynaý aıtýly sharaǵa «Ege­men Qazaqstan» respýblıkalyq gazeti» AQ prezıdenti Saýyt­bek Abdrahmanov arnaıy kelip, stýdenttermen kezdesip, óz zamanyna qaraı beıimdelgen jańa QazUÝ qalashyǵyn aralap, aýyz toltyryp aıtarlyqtaı tyndyrymdy tirlikterdi kórdi. Ata gazet pen baıyrǵy ýnı­ver­sıtettiń saltanatty toǵysýynda rektor Ǵalymqaıyr Mutanuly «Ege­men Qazaqstan» gazetiniń dáýir­li kezeńderi týraly sóz qoz­ǵap, basylym shejiresi jaıly jas­tarǵa aqpar berdi. «Osynaý mereıli merekeler tusynda ǵylym-bilim ordasy men búgingi qazaq baspasóziniń kóshbasshysy, búgingi ókilderi ótken kúnder órnekterine zamana kózimen sholý jasaı otyryp, bolashaqqa baǵdar silteýge tıisti dep oılaımyn. Sebebi, qa­zaq rýhanııatynyń eki alyp báıte­re­giniń altyn tamyrlary tarıh tereńinde túıisip jatqandaı», dedi rektor. Osydan keıin «Egemen Qa­zaq­stan» gazetiniń basshysy Saýytbek Abdrahmanov stýdentterge zamana aǵysy, basylym baǵdary, BAQ-tyń keleshegi, búgingi kúnniń kókeıkesti máseleleri jaıynda áńgimelep berdi. Stýdentterdiń jýrnalıstıkaǵa qatysty saýaldaryna jaýap berdi. Saltanatty jıynda ekijaqty Yntymaqtastyq memorandýmyna qol qoıyldy. Sol sııaqty QazUÝ Ǵylymı kitaphanasynyń ege­men­qa­zaqstandyqtar shyǵar­m­a­shy­lyǵyna arnalǵan kórmesi uıym­dastyryldy. «Egemen Qazaqstan» gazetindegi QazUÝ shejiresi» atty beınefılm kórsetildi. Sony­men qatar, qonaqtarǵa arnap stý­dentter ánnen shashý shashyp, jyr shýmaqtaryn arnady. Aıtý­ly oqıǵa aıasynda Saýyt­bek Abdrahmanovqa QazUÝ-diń 80 jyl­dyq mereıtoı medali tabys etildi. Basylymnyń birqatar jýr­na­lısteri ýnıversıtettiń Alǵys hattaryna laıyq dep tabyldy. Dál osy kúni jýrnalıstıka fa­kýltetinde «Egemen Qazaqstan» aqparat ortalyǵy ashyldy. En­digi jerde osy ortalyqtyń kó­megimen ýnıversıtettiń jýrnalıstıka fakýlteti redaksııamen tyǵyz qarym-qatynas ornatyp, stýdentterin tájirıbeden ótkizip, shyǵarmashylyq birlesken jobalardy júzege asyrýdy kózdep otyr. Aınash ESALI, «Egemen Qazaqstan». ALMATY.