Keshe Premer-Mınıstrdiń birinshi orynbasary Baqytjan Saǵyntaev bastaǵan qazaqstandyq delegasııa Mınsk qalasynda ótken TMD Úkimet basshylary keńesiniń otyrysyna qatysty. Osy basqosýdyń aldynda ǵana TMD elderiniń delegasııa basshylary Belarýs Respýblıkasynyń Prezıdenti Aleksandr Lýkashenkomen kezdesip, otyrystyń kún tártibin talqylap, Dostastyq aıasyndaǵy yntymaqtastyqty tereńdetý jáne halyqaralyq taqyryptaǵy ózekti máseleler boıynsha pikirler almasqan bolatyn, dep habarlady QR Premer-Mınıstriniń baspasóz qyzmeti.
Otyrystyń kún tártibinde dostastyq elderiniń ózara árekettestigin tereńdetýge baǵyttalǵan 20-ǵa jýyq ekonomıkalyq, gýmanıtarlyq jáne uıymdyq máseleler qaraldy. Atap aıtqanda, TMD elderiniń 2020 jylǵa deıingi ınnovasııalyq yntymaqtastyǵy jónindegi memleketaralyq baǵdarlamanyń 2013 jylǵy oryndalý barysyna taldaý jasalyndy.
Otyrysta B.Saǵyntaevtyń óz sózinde atap kórsetkenindeı ekonomıka salasynda ınnovasııalyq yntymaqtastyqty nyǵaıtý, sondaı-aq, ortaq aýyl sharýashylyǵy rynogyn damytyp, TMD elderiniń azyq-túlik qaýipsizdigin qamtamasyz etý asa mańyzdy máselelerdiń biri bolyp tabylady.
Otyrys barysynda, ǵylymı-tehnıkalyq aqparattar men memleketaralyq almasý salasyndaǵy yntymaqtastyqty retke keltirý týraly kelisimge qol qoıyldy. Sondaı-aq, radıonavıgasııa men gıdrometrologııa salalarynda ózara árekettestikti damytý jóninde sharalar belgilenip, taýarlardyń shyǵý tegi boıynsha elderdi anyqtaý erejesine ózgerister engizildi.
Gýmanıtarlyq saladaǵy yntymaqtastyq máseleleri talqylanyp, TMD-daǵy ulttyq sport túrlerin damytý, maldardyń aýsyl aýrýynyń taralý qaýpimen kúres máseleleri jóninde sharalar ázirlendi.
Otyrysta, basqa da birqatar máseleler qaraldy. Kelesi basqosý 21 qarashada Ashǵabad qalasynda ótedi dep belgilendi.
Suńǵat ÁLIPBAI,
«Egemen Qazaqstan».