Saıası qýǵyn-súrgin qurbandaryn eske alý kúnine arnalǵan «Tarıhtan – taǵylym, ótkenge – taǵzym» atty halyqaralyq ǵylymı-praktıkalyq konferensııaǵa qatysýshylardyń Qazaqstan Respýblıkasynyń Prezıdenti N.Á. Nazarbaevqa
ÚNDEÝI
Qurmetti Nursultan Ábishuly! Qazaqstan halqy Assambleıasynyń 20 jyldyǵy qarsańynda Saıası qýǵyn-súrgin jáne asharshylyq qurbandaryn eske alý kúnin atap óte otyryp, Qazaqstan halqy Assambleıasy bastamashy bolǵan «Tarıhtan – taǵylym, ótkenge – taǵzym» halyqaralyq forýmyna qatysýshylar, Sizdiń beıbitshilik, qoǵamdyq kelisim jáne el birligin kózdeıtin saıasatyńyzdyń mańyzdy basymdyqtarynyń biri – búgingi jáne keleshek urpaqqa úlgi bolatyn tarıhı sanany saqtaý ekenin málimdeımiz. Sizdiń saıası erik-jigerińizdiń arqasynda Qazaqstan halyqaralyq qoǵamdastyqtyń arasynda toleranttylyq jáne halyqtar arasynda senimdilik qoǵamdyq mádenıettiń normasy bolyp tabylatyn jáne adamgershilikti nasıhattaıtyn saıasaty bar memleketke aınaldy. Bizdiń jalpyǵa ortaq tarıhymyzǵa obektıvti jáne shynaıy kózqarasymyzdy qalyptastyratyn jáne jiberilgen qatelikterdi qaıtalamaý úshin sabaq bolatyn totalıtarlyq terror, halyqtardyń kúshtep jer aýdarylýlary, saıası qamaýlar jáne repressııalar tarıhyn zertteý boıynsha zor eńbekti atap otyrmyz. Ashtyq zardaptaryn kórgenine qaramastan, qazaq halqynyń toleranttylyǵy, keńpeıildigi, danalyǵy jáne qonaqjaılyǵynyń arqasynda júz myńdaǵan adam tiri qalyp, tutastaı halyqtar aman qaldy. Sizdiń qoldaýyńyzben Qazaqstanda 2010 jyldan beri «Tarıhtan – taǵylym, ótkenge – taǵzym» halyqaralyq aksııasyn ótkizý dástúrge aınaldy. Búgingi kúni búkil halyq osy aksııaǵa qatysady, onyń aıasynda 2123 is-shara ótkizilip, olardyń qyzmetine 350 myń adam belsene aralasady. Bıyl kezekti estafetany Alash ult-azattyq qozǵalysynyń otany, uly Abaıdyń týǵan jeri – Shyǵys Qazaqstan oblysy Semeı qalasy aldy. Jalpyulttyq sana-sezimdi damytý, beıbitshilik, rýhanııat jáne kelisim mádenıetin nyǵaıtý boıynsha taǵy bir úlken qadam jasaldy. Biz, «Tarıhtan – taǵylym, ótkenge – taǵzym» halyqaralyq forýmyna qatysýshylar, álemde keńinen moıyndalǵan Sizdiń qoǵamdyq kelisim jáne el birligin saqtaýdyń salıqaly saıasatyńyzdy tolyq qoldaıtynymyzdy málimdeımiz. Biz tarıhı sanamyzdy saqtaı otyryp, yntymaqtastyq pen senimdiliktiń ulttyq qundylyqtaryn qalyptastyrý arqyly, ózimizdiń ortaq maqsatymyzǵa – Qazaqstannyń turaqty damýyna jáne gúldenýine qol jetkizetinimizge nyq senimdimiz! 2014 jylǵy 30 mamyrda, Semeı qalasynda ótken «Tarıhtan – taǵylym, ótkenge – taǵzym» halyqaralyq forýmynda qabyldandy