Jambyldyń ǵana emes, elimizdegi hımııa ónerkásibiniń lokomotıvi sanalatyn «Qazfosfat» JShS-nyń sońǵy kezderi basy daýdan arylmaı qoıdy. Biraz ýaqyt buryn myńdaǵan qyzmetkeri bar kásiporynnyń Sarysý aýdanyndaǵy bólimshesinde oqys oqıǵa tirkelgen edi. «Qarataý» ken óndirý kombınatyndaǵy fosfor untaqtaıtyn qurylǵy ishinde jóndeý jumystary júrgizilip jatqan shaqta dıirmen ózdiginen iske qosylyp, eki adam baqılyq boldy.
Másele munymen bitken joq. Keıinnen Tarazdaǵy kúkirt qyshqyly sehy óndirisindegi keleńsiz jaǵdaıdan keıin kóne shahar tóbesin kók tútin basyp qaldy. Kúmándi tumannyń qarqynynan qaımyqqan jurt baıbalamǵa saldy. Ábigerge túsken el daqpyrt áńgimemen áleýmettik jelini shýlatty. Endi mine, eńbek daýy sıpatyndaǵy jańa bir janjaldyń oty tutandy. Qysqasy, jeti myńǵa jeteǵabyl adamdy jumyspen qamtyp otyrǵan mekeme basshylary jaqsylap oılanbasa, daýǵa qalǵany qalǵan.
Júzdegen qyzmetker nege dúrligip kóshege shyqty? Osy másele kimdi de bolsa oılandyrmaı qoımasy anyq. Álbette, áýelgi sebep seriktestiktiń sıfrlyq transformasııa basqarmasynyń basshysy Oleg Kýlıkovtiń qyzmetkerlerge dóreki sóılegenimen sabaqtastyrylyp otyr. Dese de bul jerde birinshi kezekte eńbek daýy máselesi kórinis beredi. Iá, O.Kýlıkov rasynda da artyq qylam dep tyrtyq qylǵan sekildi. Narazy toptyń aldyna kelgen ol eks-áriptesterinen keshirim surady. Eks deýimizdiń de ózindik syry bar. Qyzmetkerlerge dóreki sóıledi degen basqarma basshysy sol mezette jumysymen qosh aıtysty. Burynǵy ujymynyń aldynda eki qolyn ókpesine qoıyp turyp keshirim surady.
Jalpy, seriktestik qyzmetkerleri ótkir máselelerdi buǵan deıin de jıi aıtyp júretin. Ashýǵa býlyqqan jurt áleýmettik teńsizdikten ábden zárezap bolǵan sekildi. Osylaısha, másele ýshyqty, eńbek daýyna aınalyp ketti. Áýelde ár jerden ún qatqan qyzmetkerler sońynan birneshe pýnktten turatyn talaptaryn alǵa tartty.
Olar birinshi kezekte ishki is-qaǵazdardyń memlekettik tilde júrgizilgenin qalaıdy. Emdelýge beriletin tólemaqyny qalpyna keltirý, kásibı kıimmen qamtamasyz etý, 15 shaǵyn aýdannan jáne qala irgesindegi eldi mekenderden jumysshylardy sapaly qoǵamdyq kólikpen jetkizý, qyzmetkerlerdiń sanyn arttyrý, ekinshi aglomashınaǵa qarajat bólý sekildi 13 pýnktten turatyn talaptardy arnaıy qurylǵan jumysshy top nazarǵa almaq. Taraz qalasynyń ákimi Baqytjan Orynbekovtiń ózi ótkir máseleniń baıyppen sheshilýin qadaǵalaıdy.
Ras, áýelde jurt ultaralyq sıpat berýge tyrysqan janjaldyń negizi eńbek daýy, áleýmettik teńsizdikpen kúreste jatqany aıqyn ańǵarylyp tur. Áleýmettik jelide tarap ketken qyzmetkerlerdiń talaptary osyǵan anyq kóz jetkizýge múmkindik berdi. Narazylyqqa shyqqandardyń ishinde áıgili seriktestik memleket menshigine qaıtarylsyn degen talapty qoıǵandar da boldy. Bul endi qanshalyqty qısynǵa keletinin jaýapty organdar anyqtaı jatar.
Bir belgilisi, qyzmetkerlerdiń talaby jergilikti atqarýshy bıliktiń nazarynan tys qalmaq emes. Muny resmı jaýaptan da anyq baıqap otyrmyz.
«Bıylǵy jyldyń 23 qarashasy kúni saǵat 11:40 shamasynda «Qazfosfat» JF qyzmetkerleri arasynda túsinbeýshilik týyndady. «Qazfosfat» JShS-yna qarasty sıfrlyq transformasııa basqarmasynyń basshysy áriptesterine dóreki sóılegen. Sonyń saldarynan túsinbeýshilik oryn alǵan. Oblys ákiminiń birinshi orynbasary Nurjan Kalenderov, oblys ákiminiń orynbasary Qanatbek Mádibek, oblys prokýrorynyń orynbasary Nurbek Ulasbekuly qyzmetkerlermen kezdesip, túsindirý jumystaryn júrgizdi. «Qazfosfat» JShS-yna qarasty sıfrlyq transformasııa basqarmasynyń basshysy áriptesterinen keshirim surady. Ol jumystan shyǵaryldy. Jınalǵan qyzmetkerlerdiń sany 200-di qurady.
Osy oǵıǵaǵa qatysty zaýyt ishinen erikti 20 adamnan quralǵan jumysshy top quryldy. Top quramyna ár sehtyń basshysy jáne kásipodaq ókilderi enip, ózekti máseleler boıynsha jumystar júrgizýde. Qazirgi tańda kásiporyndaǵy ahýal turaqtandy. Jaǵdaı oblys ákiminiń tikeleı baqylaýynda», delingen resmı jaýap mátininde.
Álbette, bir qyzmetkerdiń ańdamaı sóıleýinen bastalǵan eńbek daýy qysqa merzimde sheshimin tabýy kerek. Olaı bolmaǵan jaǵdaıda másele taǵy da ýshyǵa túsýi yqtımal. Bir belgilisi, 28 qarasha kúni joǵaryda kóterilgen máselelerdiń ońynan sheshilýine basa nazar aýdarylatyn jıyn ótpek. Jumysshy toptyń júrgizgen jumysynyń sapasy sol kezde naqtylanbaq. Bul másele bizdiń de nazarymyzda bolady.
TARAZ