Álemdik dodada júldeli bolý úshin sportshyǵa úlken júrek qajet. Bul – mektepte oqyp júrip, úlken sportqa úıir bolǵan oqýshy úshin de basty mindet. Muny Taldyqorǵandaǵy Nazarbaev zııatkerlik mektebiniń shákirtteri jaqsy túısinedi. Oǵan Birikken Arab Ámirlikterinde djıý-djıtsýden jeńimpaz bolǵan jastar dálel.
Ashyq chempıonat Abý-Dabıde ótti. Atalǵan dodaǵa álemniń túkpir-túkpirinen bes myńnan astam sportshy qatysty. Bul dodada bizdiń jas balýandardyń da baǵy jandy. Sol baıraqty básekede djıý-djıtsýden Ańsar Nesipqalı moınyna altyn taqsa, Kabır Álimhanov kúmispen kúpteldi. Al Aıat Mamanov qola medaldy qanjyǵasyna baılap qaıtty.
5-synyp oqýshysy Ańsar Nesipqalı mundaı aýqymdaǵy chempıonatqa birinshi ret qatysyp otyrǵan joq. Ol jeńiske jetetine esh kúmándanbaǵan. Jas sportshy ótken jyly Máskeýde de óner kórsetip, júldegerler qatarynan tabylǵan edi.
«Men djıý-djıtsýmen tórtinshi jyl aınalysamyn. Túrli jarystarda baq synap, ózimdi kórsettim. Bul dodada bes jekpe-jek ótkizdim. Meniń básekelesterim Ázerbaıjan, Iran, BAÁ elderinen kelgen djıtserler boldy. Bárin de jeńip, altyn medalǵa qol jetkizdim», deıdi A. Nesipqalı.
Onyń jan dosy 4-synyp oqýshysy Kabır Álimhanov ekinshi oryndy mise tutsa da, áli talaı jeńiske jeterine senimdi. Halyqaralyq chempıonatqa alǵash ret qatysyp otyrǵan ol, úzdik úshtikten kórinýdiń ózi úlken jetistik ekenin jetkizdi.
«Men umytylmas emosııalardy bastan ótkerdim. Osy jeńisimdi, qýanyshymdy anama arnaımyn. Bizdi daıyndaǵan bapkerlerime úlken alǵysymdy aıtamyn. Qatty tyrystym, kelesi jyly budan da jaqsy nátıje kórsetemin degen úmittemin», deıdi K. Álimhanov.
Al moınyna qola taǵyp, jetisýlyqtardy jelpintken Aıat bolsa sál daıyndyqtyń azdaý bolǵanyn jasyrmady. Ol da keler jyly ánuranymyzdy shyrqatýǵa asyq.
«Bizdiń oqýshylardyń halyqaralyq arenadaǵy óneri qazirdiń ózinde úlken jetistik dep esepteımin. Áriptesim Ernur Nurmuhanov ekeýmiz barynsha úzdik nátıjege umtylamyz. Sondyqtan djıý-djıtsýden mekteptegi daıyndyqpen qatar, balalar aptasyna eki ret qalanyń sport seksııalarynda jattyǵady. Bul chempıonatta bizdiń jasóspirim jigitter tájirıbe men bolashaq jeńisterge motıvasııa aldy», deıdi jattyqtyrýshy Aıdos Dúısentaev.
Nazarbaev zııatkerlik mektebiniń djıý-djıtsý úıirmesi 2013 jyldan beri jumys isteıdi. Osy jyldar ishinde talaı oqýshy halyqaralyq, respýblıkalyq jarystarda chempıon atandy. Jarqyn mysal retinde «Astana Open» halyqaralyq grepplıng týrnıriniń jeńimpazdary atanǵan Ernar О́mirzaqov pen Vladımır Kandy aıtýǵa bolady.
Jetisý oblysy