ASTANA. 2 maýsym. Bıyl elimizde 92 myńnan astam mektep bitirýshi túlek ulttyq biryńǵaı testileýge qatysyp, baq synaıdy. Olarǵa shamamen 34 myń memlekettik grant bólinip otyr. Bul týraly egemen.kz tilshisi habarlady.
Bilim jáne ǵylym mınıstri Aslan Sárinjipovtyń aıtýynsha, bólinip otyrǵan granttyń 12 myńy tehnıkalyq, 5 myńǵa jýyǵy pedagogıkalyq, 2600-i aýyl sharýashylyǵy mamandyqtaryna beriledi.
Jas talapker ulttyq joǵary oqý ornyna túsý úshin 70, agrarlyq ýnıversıetterge 60, al qalǵan oqý oryndaryna 50-den joǵary ball jınaýy kerek.
Qazir belgili bolyp otyrǵandaı, bilim granty oqý ornyna emes, talapkerge tikeleı beriledi. Al shekti bal ózgerissiz qaldyryldy.
Mınıstrdiń sózine qaraǵanda, bıylǵy ulttyq biryńǵaı testileýge engizilgen jańa suraqtar sapaly kórinedi.
Aslan Sárinjipov: «Biz jyl saıyn qoldanylatyn 50 myń saýaldyń 14 myńyn jańarttyq. Jyl saıyn appelıasııanyń jumys isteıtini belgili. Barlyq komıssııa aqparatty jınap Bilim jáne ǵylym mınıstrligine joldaıdy. Biz ony saraptaı kelip, jyl saıynǵy saýaldarǵa ózgeris engizemiz», – dedi.
Elimiz boıynsha ulttyq biryńǵaı testileý 155 orynda tapsyrylady. Al «Altyn belgige» usynylǵan 4491 bitirýshi túlek bar. Olar ózderiniń bilimderiniń joǵary deńgeıde ekenin osy testileýde dáleldep shyǵýlary tıis.
Joldybaı Bazar.
Derekkóz: egemen.kz
Foto: Alashainasy.kz.