Senat depýtattary Sultanbek Mákejanov pen Baqtybaı Shelpekov qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl jónindegi Eýrazııalyq toptyń 37-jalpy otyrysyna qatysty.
Depýtattar qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa jáne jappaı qyryp-joıý qarýyn taratýǵa qarsy is-qımyl salasyndaǵy halyqaralyq standarttardy úılestirý men olardyń oryndalýyna baqylaý júrgizý tetikterin engizýge baǵyttalǵan zań jobalaryn ázirleý men olardy iske asyrýdaǵy tájirıbelerimen basqa elderden kelgen áriptestermen bólisti.
Senator S.Mákejanov is-shara barysynda elimizdiń zańnamasyn jetildirý tájirıbesimen, atap aıtqanda, sońǵy jyldardaǵy ulttyq zańnamaǵa engizilgen negizgi túzetýlermen tanystyrdy.
«Biz Ádiletti Qazaqstan quryp jatyrmyz. Reformalardyń mańyzdy maqsaty – ulttyq tabysty ádil bólýdi qamtamasyz etý. Memleket basshysy Qasym-Jomart Toqaev bıznes ókilderimen, halyqpen kezdesý kezinde zańsyz alynǵan kapıtaldy memleketke qaıtaryp, olardy azamattardyń múddesine paıdalaný kerektigin birneshe ret aıtqan bolatyn», dedi S.Mákejanov.
Senator Qazaqstan Parlamenti qabyrǵasynda osy saladaǵy zańnamany jetildirý jumystary belsendi júrip jatqanyn da atap ótti. Parlament bıyl jazda qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl týraly zańdardy qabyldady.
«Qazaqstan syndarly ári salıqaly saıasat júrgizip keledi. Biz qazirgi jaǵdaıda kiristerdi jylystatýǵa qarsy turý máselesin jekelegen elderdiń jeke dara ulttyq problemasy emes oılaımyz. Osyǵan baılanysty bizge halyqaralyq uıymdardyń neǵurlym belsendi qatysýy jáne shynaıy yntymaqtastyǵy qajet», dedi senator S.Mákejanov.