Uzaq jyldar boıy jolynda qan da, jas ta, ter de tógilgen táýelsizdik bizdiń halqymyz úshin asa qymbat. Al sol egemendigimiz ben eldigimizdiń baıandy bolýy ishki turaqtylyqtyń saqtalýyna tikeleı baılanysty. Qoǵamdyq tártip pen qaýipsizdikti qamtamasyz etetin Ulttyq ulan sapyna jyl saıyn on myńdaǵan bozbala kelip, Otan aldyndaǵy azamattyq boryshyn óteıdi.
Astana irgesindegi 5573 áskerı bóliminiń ózinen jyl saıyn elimizdiń túkpir-túkpirinen kelgen bir jarym myńdaı jas sarbaz eline qorǵan bolar rýhy myǵym azamat bop túlep shyǵady. Byltyr osy ýaqytta jedel quramanyń tabaldyryǵyn attaǵan kúzgi shaqyrylym ózderine júktelgen mindetterdi abyroımen aıaqtap, taıaýda týǵan ólkelerine attandy.
Jaqynda Ulttyq ulannyń astanalyq áskerı qalashyǵynda 2021 jylǵy shaqyrylym sarbazdaryn qurmetteý keshi ótti. Saltanatty is-shara ádettegideı, sahna tórine elimizdiń Memlekettik Týyn kirgizýden bastaldy. Jandy daýysta Ánuran shyrqalǵan soń, bólim komandıri polkovnık Aıan Esjanov áskermen qoshtasqaly otyrǵan býynǵa sóz arnady. Aıan Abdýǵanıuly sarbazdarǵa adal qyzmetteri úshin komandırlik alǵysyn bildirip, rýhtaryn kóterdi. Aǵalyq ósıetin aıtyp, jaýyngerlik qyzmette erekshelengen sarbazdarǵa marapat tapsyrdy.
Árbir sarbazdyń áskerı isti meńgerýinde, naǵyz Otan qorǵaýshy bop qalyptasýyna yqpal etken úlken-kishi komandırlerge, jyl boıy qoldaý tanytqan ata-ana, jaqyndaryna da alǵys bildirdi. Is-shara barysynda sarbazdarǵa óz batalondary týraly ádemi beınerolıkter, qyzmet joldary men demalys ýaqytyndaǵy qýanyshty sátteri taspalanǵan estelik sıýjetter kórsetildi.
Sondaı-aq kesh ıelerine arnap Ulttyq ulannyń án-bı ansambliniń shyǵarmashylyq ujymy konserttik baǵdarlama usyndy. Kesh sońyna keıingi tolqyn atynan qatardaǵy Oljas Shırajedenov jaýyngerlik jol kórsetken aǵa býynǵa án arnady. Bólim basshylyǵy men qarýlastary tarapynan kórsetilgen qurmet sarbazdarǵa erekshe kóńil kúı, shattyq syılady. Merekelik keshti áskerı bólim komandıriniń tárbıe jáne áleýmettik-quqyqtyq jumystar jónindegi orynbasary, podpolkovnık Aıdar Júsipbekov qorytyndylap, jaýyngerlerdiń úılerine aman-saý oralýyn tiledi. Is-shara aıaqtalǵan soń estelik úshin Jaýyngerlik Tý aldynda sýretke túsip, qos býyn bir-birimen qımastyqpen qoshtasty.
Nazgúl BAIShINA
Astana