Fýtboldan Qatarda ótip jatqan álem chempıonatynyń ekinshi týr oıyndary máresine jetti. Álemdik teńbil dop merekesiniń jetinshi kúninde jankúıerler G jáne H toptaryndaǵy quramalardyń matchyn tamashalady. Atap aıtqanda, G tobynyń alǵashqy kezdesýinde Kamerýn men Serbııa, ekinshisinde Brazılııa men Shveısarııa sheberlik baıqasty. Al H tobynyń kvartetinde Koreıa men Gana, Portýgalııa men Ýrýgvaı quramalary jasyl alańda jolyqty.
Buǵan deıingi álem chempıonattarynyń tarıhyna kóz júgirter bolsaq, ekinshi týrdan keıin-aq birqatar quramanyń pleı-off kezeńine joldama alǵany, týrnırmen qoshtasatyn aýtsaıderler belgili bolyp qoıatyn. Al Qatardaǵy dop dodasynyń 2-týrynan keıin nebári úsh qurama ǵana kelesi kezeńge shyqty. Olar: Fransııa, Brazılııa jáne Portýgalııa. Jarys qojaıyny Qatar men Kanada álem chempıonatyndaǵy joryǵyn toptyq kezeńnen aıaqtaıtyn boldy. Dese de, áli 27 quramanyń kelesi kezeńge shyǵý múmkindigi saqtalyp tur. Bul – fýtbol jankúıerlerin keshe bastalǵan úshinshi týrda birinen biri ótetin tartysty matchtar kútip tur degen sóz.
G tobynyń ekinshi týrynda Kamerýn men Serbııa quramalary bir-biriniń qaqpasyna úsh goldan soqsa da, ekeýi de úsh upaı oljalaı almady. 2019 jyly paıdalanýǵa berilgen «Ál-Janýb» stadıonynda ótken kezdesý 3:3 esebimen teń aıaqtaldy. Bul – ekinshi týrdaǵy matchtarda eń kóp gol soǵylǵan jáne eń iri esep tirkelgen jalǵyz match boldy. Kezdesýdiń esebin 29-mınýtta Kamerýn quramasynyń ortalyq qorǵaýshysy Jan Kastelletto ashty. Buryshtamadan asyrylǵan dop birinshi Nıkolıa N’Kýlýdyń basyna tıip, keıinnen Kastellettonyń aıaǵynan tabyldy. Qaqpanyń aldynda qaraýsyz turǵan Jan Serbııa qaqpasyna op-ońaı gol soǵyp ketti.
45 mınýt boıy tarazy basyn teńestire almaǵan serbııalyqtar birinshi taımǵa qosylǵan alty mınýttyń ishinde eki gol soǵyp, tarazy basyn teńestirip qana qomaı, esepte alǵa shyǵyp aldy. 46-mınýtta Strahınıa Pavlovıch aıyp dobynan asyrylǵan pasty nátıjeli aıaqtasa, arada eki mınýt ótkende Sergeı Mılınkovıch-Savıch buryshtamadan gol soqty.
Ekinshi taım bastalǵan bette Serbııa fýtbolshylary taǵy da kamerýndyqtardy qapy qaldyrdy. 51-mınýtta eýropalyqtardyń kombınasııalyq shabýylyn Aleksandar Mıtrovıch golmen túıindedi – 3:1. Keıinnen Kamerýn fýtbolshylary alań ortasynda belsendi oınaı bastady. Sóıtip aınaldyrǵan úsh mınýtta afrıkalyqtar tablodaǵy kórsetkishti 3:3-ke jetkizdi. 63-mınýtta Vensan Abýbakar mergendigimen kózge tússe, 66-mınýtta Erık Maksım Shýpo-Motıng oıynnyń núktesin qoıdy.
«Stadium 974» stadıonyndaǵy ekinshi matchta Brazılııa Shveısarııany bir dop aıyrmasymen jeńip (1:0), Fransııanyń sońynan ekinshi bolyp pleı-off kezeńine shyqty. Eýropada Italııadan keıin qorǵanysta saýatty oınaıtyn shveısarııalyqtar bul matchta Brazılııa quramasynyń shabýylshylaryn ábden ábigerge saldy. Birinshi taımda bes dúrkin álem chempıondary gol soǵa almaǵanymen, ekinshi taımda báribir óz degenderine jetti. Alǵashqy týrda Serbııa qaqpasyna eki gol soqqan Rısharlıson bul matchta da mergendik tanytqan edi. Alaıda tóreshi gol soǵylǵan sátti VAR arqyly qaıta qarap, Rısharlısonnyń oıynnan tys qalǵanyn málimdep, soǵylǵan goldy eseptemeı qoıdy. Dese de matchtyń aıaqtalýyna sanaýly mınýt qalǵanda Kazemıro óziniń joıqyn soqqysymen kózge túsip, komandasyn 1/8 fınalǵa shyǵardy.
H tobynyń alǵashqy oıynynda Koreıa fýtbolshylary Afrıkanyń tórt dúrkin chempıony Gana quramasyn jeńe almady – 3:2. Qatardyń Ál-Raıan qalasynda ornalasqan «Edıýkeıshn Sıtı» stadıonynda 100 mınýtqa jalǵasqan matchtyń birinshi taımynda Gana fýtbolshylary aıqyn basymdyq tanytty. 24-mınýtta Muhammed Salısý nysanany dál kózdese, arada 10 mınýt ótkende Muhammed Kýdýs koreıalyq qaqpashyny qapy qaldyrdy – 2:0.
Ekinshi taım bastalǵan bette Koreıa quramasynyń shabýylshysy Chjo Gıý Son eki birdeı jyldam golynyń arqasynda tarazy basyn teńestirip, Gananyń qarqynyn qaıtarǵandaı boldy. Degenmen, koreıalyq fýtbolshylardan kambek kútken jankúıerlerdiń qýanyshyn 68-mınýtta Muhammad Kýddýs sý sepkendeı basty. Oıyndaǵy ekinshi golyn soqqan ol komandasyna úshinshi týr oıyndary aldynda mańyzdy úsh upaı syılady.
Ekinshi týrdy Portýgalııa men Ýrýgvaı quramalary túıindedi. Birinshi týrda Gana quramasyn 3:2 esebimen áreń jeńgen portýgalııalyqtar bul týrda Ýrýgvaıdy esh qıyndyqsyz tize búktirdi – 2:0. Birinshi taımda 2016 jylǵy Eýropa chempıondary dopqa ıelik etý boıynsha aıqyn basymdyqqa ıe bolǵanymen, qarsylastary qaqpasyna nebári bir ǵana dál soqqy baǵyttaı aldy. Sóıtip birinshi taımda birde-bir gol kórmegen jankúıerler ekinshi taımda eki goldyń kýási boldy. 54-mınýtta «Manchester Iýnaıted» pen Portýgalııa quramasynyń jartylaı qorǵaýshysy Brýný Fernandesh gol soqqanda qyzyq jaǵdaı tirkeldi. Alǵashynda Fernandesh tepken dopty Krıshtıaný Ronaldý baspen qaqpaǵa baǵyttap jibergendeı kórinip, match hattamasyna Ronaldýdyń esimi jazylǵan-dy. Keıinnen bul golǵa Krıshtıanýdyń esh qatysy joq ekeni anyqtalyp, oıyn hattamasyna Brýný Fernandeshtiń esimi jazyldy. Kezdesýdiń sońynda tóreshi Ýrýgvaı qaqpasyna 11 metrlik aıyp dobyn belgiledi. Ony Brýný sátti oryndady. Osylaısha, eki oıynda 6 upaı jınaǵan Portýgalııa pleı-off kezeńine merziminen buryn shyqqan úshinshi qurama atandy.