Qazaqstan Respýblıkasynyń Syrtqy ister mınıstri Erlan Ydyrysov Argentına Syrtqy ister mınıstri Ektor Tımermanmen onyń Qazaqstanǵa resmı sapary aıasynda kezdesti. Bul Latyn Amerıkasy memleketi syrtqy saıasat vedomstvosy basshysynyń Qazaq eline alǵashqy sapary bolyp tabylady, dep habarlady QR SIM-iniń baspasóz qyzmeti.
Suhbattasýshylar ekonomıka, saýda, ınvestısııa, týrızm salasyndaǵy Qazaqstan-Argentına yntymaqtastyǵy máseleleri men halyqaralyq kún tártibindegi ózekti máselelerdi talqylady.
«Bizdiń elderimiz arasyndaǵy uqsastyqtar óte kóp, bizdiń kózqarastarymyz ben adamzat aldynda turǵan turaqty damý men ekologııa, ıadrolyq qaýipsizdik pen kóppolıarly álemdi nyǵaıtý máselelerindegi qaýip-qaterlerdi sheshý tásilderimiz óte uqsas», dep atap ótti E.Ydyrysov.
«Biz Argentınanyń osy jyldyń ekinshi jartysynda ókiletti bıznes-delegasııasyn Qazaqstanǵa baǵyttaýdy josparlap otyrǵanyna qýanyshtymyz. Biz argentınalyq bıznesmenderge óz tarapymyzdan olardyń qazaqstandyq áriptesterimen yntymaqtastyqtaryn bastaı alatyndaı mazmundy baǵdarlama daıyndamaqpyz», dep atap ótti QR SIM-iniń basshysy. Ol, sonymen qatar, saýda-ekonomıkalyq yntymaqtastyq jóninde ekijaqty komıssııa qurý jospary men Argentına tarapynyń Qazaqstannyń Dúnıejúzilik saýda uıymyna kirý máselesine qoldaý kórsetý týraly kelissózderdiń jalǵasyp jatqanyna nazar aýdardy.
Eki eldiń syrtqy saıasat vedomstvolarynyń basshylary, sondaı-aq, halyqaralyq uıymdar sheńberindegi yntymaqtastyqty talqyǵa saldy. «Biz elderimizdiń BUU-nyń túrli qurylymdaryna úmitkerlikti ózara qoldap otyratynymyzǵa qýanyshtymyz jáne men ózimniń áriptesime Argentınanyń 2017-2018 jyldarǵa BUU QK turaqty emes músheligine Qazaqstan kandıdatýrasyn qoldaǵany úshin erekshe alǵysymdy bildiremin. Argentınanyń qoldaýy biz úshin óte qundy jáne biz bolashaqta BUU QK quramynda bola otyryp, ortaq múddelerimizdi qorǵaýǵa nıettimiz», dep málimdedi E.Ydyrysov.
Bizdiń elderimiz arasyndaǵy jan-jaqty yntymaqtastyqtardy tereńdetýge serpin beretin Qazaqstan Respýblıkasynyń Úkimeti men Argentına Respýblıkasynyń Úkimeti arasyndaǵy azamattardyń vızasyz saparlary týraly kelisimge qol qoıý kelissózderdiń mańyzdy qorytyndysy boldy. Qazaqstan syrtqy saıasat vedomstvosynyń basshysy qazaqstandyq SIM álem elderimen vızasyz rejim ornatý boıynsha jumysyn belsendi túrde jalǵastyratynyn, onyń ishinde taǵy bir Latyn Amerıkasyndaǵy memleket – Chılımen ornatý jospary bar ekenin málimdedi. Qazaqstan ótken jyly Chılımen eki el resmı delegasııalary úshin vızasyz sapar jasaý týraly kelisimge qol qoıǵan bolatyn.
E.Tımmerman óz kezeginde eki jaqty qatynastar damýynyń joǵary serpinin atap ótip, óz eliniń taý-ken, aýyl sharýashylyǵy jáne atom ónerkásibi salalarynda yntymaqtasýǵa degen qyzyǵýshylyǵy bar ekenin bildirdi. Ol, sondaı-aq, Argentına SIM basshysynyń Qazaqstanǵa tuńǵysh saparynyń mańyzy joǵary ekenin atap kórsetti. Kezdesý sońynda eki el ózara tıimdi qarym-qatynas ornatatynynan úmitti ekenin jetkizdi.