Keshe Ortalyq kommýnıkasııalar qyzmetinde Ulttyq bank tóraǵasy Qaırat Kelimbetov baspasóz máslıhatyn ótkizdi. Onda Almatyda óńirlik qarjy ortalyǵyn qurý jáne onyń jumys isteý máseleleri týraly aıtyldy. Buıyrtsa, 2020 jylǵa deıin Almaty qalasyndaǵy qarjy ortalyǵyn damytý tujyrymdamasy bıylǵy jyldyń sońyna deıin qabyldanbaq eken. Ol jóninde brıfıngte Ulttyq bank tóraǵasy aıtty. «Almatyda qarjy ortalyǵyn qurý bastamasy, osy ýaqytqa deıin tıisti deńgeıde damytylǵan joq bolatyn. Desem de, Memleket basshysynyń tapsyrmasymen búgin Úkimet Ulttyq bankpen birge bul baǵytta birqatar naqty sheshimderdi keń talqylap, qabyldady. Nátıjesinde, qarjy ortalyǵynyń 2020 jylǵa deıingi damý tujyrymdamasy tolyǵymen qaıta qaralady. Endi bul qujat aǵymdaǵy jyldyń jeltoqsan aıyna deıin qabyldanatyn bolady», dedi Q.Kelimbetov. Atalǵan qujatty ázirleýge barlyq memlekettik organdary tartylypty. Sondaı-aq, bul iske Eýropa qaıta qurý jáne damý banki, Azııa damý banki, Dúnıejúzilik bank pen Islam damý bankiniń mamandary da jumyldyrylypty. Endigide qarjy ortalyqtarynyń damý salasynyń jetekshi mamandary da bul jumysqa qatyspaq nıette eken. «Taıaýda Astana ekonomıkalyq forýmy aıasynda Úkimet Islam damý bankimen 2 mlrd. AQSh dollary kóleminde ınvestısııa tartý týraly kelisken bolatyn. Sol kelisim aıasynda Ulttyq bank pen Islam damý banki arasynda kezdesýler ótti. Kezdesýde Almatyny Ortalyq Azııadaǵy Islam damý bankiniń aımaqtyq habyna aınaldyrýdy kelistik», deıdi Q.Kelimbetov. Ulttyq bank Qazaqstanda ıslam qarjylandyrý mamandaryn daıarlaýǵa bel býyp, qarjy bólmek eken. Áýelgide ıslam qarjylandyrýy boıynsha álemdik deńgeıdegi 50-ge jýyq adamdy daıarlaýdy josparlap qoıypty. Nurbaı ELMURATOV, «Egemen Qazaqstan».