Atyraý oblysy boıynsha Memlekettik kirister departamentiniń «Áýejaı Atyraý» keden beketi men Atyraý oblysy boıynsha tergep-tekserý departamentiniń qyzmetkerleri jaqynda 28 mıllıon teńgeden astam aqshany Grýzııaǵa zańsyz alyp ótpek bolǵan kúdiktini qolǵa túsirdi.
Bul oqıǵa qarasha aıynyń basynda Atyraý áýejaıynda tirkelgen. «Atyraý-Kýtaısı» halyqaralyq reısimen ushý barysynda ádettegideı «Rapiscan» rentgen televızııalyq apparatymen jolaýshylardyń qol júkteri tekseriledi. Kedendik baqylaý júrgizý kezinde Qazaqstan azamatynyń qol júginen 60700 dollar, 10 myń rýbl jáne 7 myń teńge qolma-qol aqsha tabylady. Zań buzýshyǵa qatysty Ákimshilik quqyq buzýshylyq týraly kodekstiń 545-baby boıynsha is qozǵaldy.
Esterińizge sala keteıik, Prezıdenttiń 2022 jylǵy 14 naýryzdaǵy №830 Jarlyǵyna sáıkes, elimizden Qazaqstan Respýblıkasynyń Ulttyq banki áketý kúnine belgilengen baǵam boıynsha eseptelgen jáne 10 myń dollar balamasynan asatyn somadaǵy qolma-qol shetel valıýtasyn jáne shetel valıýtasyndaǵy aqsha quraldaryn áketýge tyıym salynǵan.