Seısenbi kúni Qatarda ótip jatqan fýtboldan álem chempıonatynyń toptyq kezeńindegi sońǵy týr oıyndaryna start berildi. A tobynyń sheshýshi básekesinde Nıderland – Qatar, Ekvador – Senegal quramalary synǵa tússe, V tobyndaǵy 3-týrda Ýels – Anglııa, Iran – AQSh fýtbolshylary pleı-off básekesiniń eki joldamasyn sarapqa saldy.
Ádette fýtbol jankúıerleri álem chempıonaty, Eýropa birinshiligi sııaqty iri týrnırlerdiń sońǵy týrynda tek formaldy matchtardy ǵana tamashalaıtyn. Iаǵnı favorıtter bar máseleni merziminen buryn sheship tastap, keı toptarda quramalar kóbine ekinshi joldamaǵa jáne toptaǵy birinshi orynǵa talas júrgizetin. Al bıylǵy álem birinshiliginiń sońǵy týry aldynda barlyq quramada derlik pleı-off kezeńine shyǵý múmkindigi saqtalyp qaldy. Biraq sheshýshi matchtardaǵy bir ǵana qatelik, sol quramany aıaqtan shalýy múmkin edi. Máselen, keshegi Ekvador men Senegal, Iran men AQSh arasyndaǵy matchta Ekvador jáne Iran quramalary sol qatelikteriniń saldarynan toptyq kezeńnen shyǵa almaı qaldy.
A tobynyń sońǵy týr matchtary qarsańynda Nıderlandtyń ózge qarsylastaryna qaraǵanda pleı-offqa esh qıyndyqsyz shyǵatyny, al Qatardyń ekinshi týrdan keıin-aq toptyq kezeńnen árige asa almaıtyny belgili edi. Jankúıerler tarapynan Nıderland – Qatar matchyna kóp yqylas bola qoımaǵany sondyqtan. Onyń ústine, eki týrda qarsylastaryna upaı taratqan Qatardyń sensasııa jasap, Nıderland quramasyn jeńe almaıtyny da túsinikti edi. «Ál Baıt» stadıonyndaǵy matchtyń birinshi taımynda Kodı Gakpo men ekinshi taımyndaǵy Frenkı de Iongtiń golynan keıin Nıderland fýtbolshylary 2:0 esebimen jeńiske jetti.
Al bul toptyń tartysty matchy Senegal men Ekvador quramalary arasynda ótti. Sebebi eki quramanyń da kelesi kezeńge shyǵýǵa tolyq múmkindigi bar. Máselen, Senegal fýtbolshylaryna jeńiske jetken jaǵdaıda ǵana pleı-off joldamasy buıyratyn bolsa, Ekvadorǵa teń nátıje de jetkilikti edi. Alaıda Ońtústik Amerıka qurlyǵynyń ókilderi bul múmkindikti paıdalana almady. Birinshi taım aıaqtalar tusta tóreshi Ekvador qaqpasyna penaltı belgiledi. Ony Senegaldyń fýtbolshysy Ismaıla Sarr sátti oryndap, quramasyn esepte alǵa shyǵardy. Ekinshi taımda Ekvador ókili Moıses Kaısedo tarazy basyn teńestirip, jankúıerlerin bir sátke qýanyshqa bólegen edi. Biraq arada eki mınýt ótkende Senegal kapıtany Kalıdý Kýlıbalı gol soǵyp, quramasyn 1/8 fınalǵa shyǵarsa, Ekvador fýtbolshylaryn jankúıerlerimen qosa eline qaıtardy.
V tobyndaǵy kvartette Iran, AQSh jáne Ýels quramalaryna qaraǵanda Anglııanyń kelesi kezeńge ótý múmkindigi joǵary bolatyn. Aǵylshyndar Ýelsten 4:0 esebimen jeńilgen jaǵdaıda ǵana toptan shyǵa almaıtyn edi. Al Ýelsti tek jeńis qana qanaǵattandyratyn, onda da Iran men AQSh quramalary teń oınaýǵa tıis. Alaıda Qatardaǵy Brıtanııa derbıinde Anglııanyń, Iran – AQSh básekesinde amerıkalyqtardyń mereıi ústem boldy.
Alǵashqy týrda Irandy 6:2 esebimen tize búktirgen aǵylshyndar ekinshi oıynda AQSh qaqpasyna birde-bir gol soǵa almaı, ábden pushaıman bolǵan-dy. Sodan bolar, Garet Saýtgeıt jetekshilik etetin Tumandy Albıon ókilderi keshegi matchta Ýels qaqpasyna jaýapsyz úsh gol soqty. Ekinshi taımnyń 50-mınýtynda Markýs Rashford matchtyń esebin ashsa, arada eki mınýt ótkende Fıl Foden mergendigimen kózge tústi. Al 68-mınýtta dýbldiń avtory atanǵan Rashford oıynnyń núktesin qoıdy.
Al qatarlas ótken ekinshi matchta AQSh quramasy Krıstıan Pýlıshıchtiń birinshi taımda soqqan jalǵyz golynyń arqasynda Irandy jarys jolynan yǵystyryp, 1/8 fınalǵa joldama aldy. Toptyq kezeńniń eń bir qyzyqty matchyna balanǵan oıynda kópshilik azııalyq quramanyń tileýin tilegeni belgili. Degenmen Parsy shyǵanaǵy ókilderi Qatardyń sońyna ilesip, álem chempıonatymen erte qoshtasty. AQSh pen Iran fýtbolshylary 1998 jyly Fransııada uıymdastyrylǵan álemdik dop dodasynyń bir tobynda óner kórsetip, sol kezde de dál osyndaı sheshýshi týrda bir-birimen kezdesken. Eki qurama úshin esh mańyzy bolmaǵan sol matchta Iran quramasy 2:1 esebimen jeńis toıyn toılaǵan edi. Araǵa 24 jyl salyp AQSh Irannan ese qaıtaryp qana qoımaı, óz tarıhynda úshinshi márte 1/8 kezeńge joldama aldy.
Osylaısha, A jáne V toptarynyń úshinshi týr matchtarynan keıin 1/8 fınalda kezdesetin alǵashqy eki jup belgili boldy. Pleı-offta A tobynyń jeńimpazy Nıderland V tobynda ekinshi oryn alǵan AQSh quramasymen (3 jeltoqsan), A tobynyń ekinshi oryn ıegeri Senegal V tobynyń úzdigi Anglııamen (4 jeltoqsan) kezdesedi.