Keshe Taılandtyń Pattaııa qalasynda akademııalyq eskek esýden eresekter men jastar arasyndaǵy Azııa chempıonatynyń jalaýy jelbiredi.
Jeltoqsannyń 4-ne deıin jalǵasatyn saıysta el namysyn 13 eresek (11 er, 2 áıel) pen 9 jas sportshy (3 er, 6 áıel) qorǵap jatyr. Birqatar sportshy irikteýdi sátti eńserip, júlde úshin talasýǵa múmkindik alyp úlgerdi. Sportty damytý dıreksııasynyń málimeti boıynsha, eresekter arasynda (LW4h) Roza Keńes, Valentına Volkodavova, Medına Qońyrbaeva, Ekaterına Noskova kvarteti irikteýde óz tobynda márege besinshi keldi. Jarysqa 6 eldiń sportshylary qatysqandyqtan qazaqstandyqtar 3 jeltoqsanda ótetin fınalǵa joldama aldy.
Sonymen qatar eresekter arasynda synǵa túsken (LM4-) Ádilet Kerimbek, Qýanysh Bekbembetov, Danıl Petrenko men Bapan Ashambek irikteýde 6-oryn alyp, 3 jeltoqsanda ótetin fınalǵa shyqty. Jasóspirimder arasyndaǵy (JW2-) Melanı Jaqypova men Anjela Polıanına juby irikteý kezeńinde óz tobynda 4-oryn aldy. Endi olar 3 jeltoqsandaǵy fınalda baq synaıdy.