Shý boıynda týǵan belgili kúıshi-kompozıtor, áıgili «Erke sylqym» kúıimen mıllıondardyń júreginen jol tapqan Ábdimomyn Jeldibaevtyń 85 jyldyq mereıtoıy oblys deńgeıinde atalyp ótildi. Balasaǵun atyndaǵy ortalyq konsert zalǵa jınalǵan jurtshylyq Ábekeńniń shyǵarmashylyǵyna arnalǵan «Kúmbirle kúıim, elimde!» atty keshten rýhanı lázzat aldy.
Kúı kúmbirimen kómkerilgen keshti óńir basshysynyń birinshi orynbasary Nurjan Kalenderov quttyqtaý sózben ashyp, Ábdimomyn Jeldibaevqa oblys ákimi Nurjan Nurjigitovtiń quttyqtaý hatyn tabystady. Qalyptasqan dástúr boıynsha mereıtoı ıesiniń ıyǵyna zerli shapan japty.
Is-shara barysynda «Parasat», «Qurmet» ordenderiniń ıegeri, Qazaqstannyń Eńbek sińirgen mádenıet qaıratkeri Ábdimomyn Jeldibaevtyń shyǵarmashylyǵynan syr shertken «Syrly sazdyń syńǵyry» atty jınaq áýlıetalyq áleýmetke tanystyryldy.
Áýlıeata jurty kúı kúmbirine elitken keshte QR Mádenıet qaıratkeri, dırıjer Nurlan Bekenov, Kenen Ázirbaev atyndaǵy oblystyq fılarmonııanyń ánshileri men «Qazaq orkestri» jáne ujymnyń kórkemdik jetekshisi, dırıjer Dýlat Baızildaev ónerlerin ortaǵa salyp, mereıtoı ıesiniń mereıin tasytty.
Jergilikti kórermenderdiń qoshemetine bólengen ónerpazdar Ábekeńniń «Erke sylqym», «Jetisý sazy», «Áýlıeata», «Kóksholaq», «Qyzyl elik» sekildi ózge de shyǵarmalaryn shabyttana oryndady. Is-shara barysynda sóz alǵan Á.Jeldibaev jergilikti ónersúıer qaýymǵa alǵysyn jaýdyrdy.
«Táńir tartý etken talanttyń arqasynda kúıden bólek birneshe án jazdym. О́ner halyqpen birge jasaıdy. О́ner adamynyń mereıin ósiretin de, óshiretin de – eli. Qandaı da bir tabystarǵa qol jetkizgen bolsam, bári de halyqtyń arqasynda», dedi mereıtoı ıesi tolqyp turyp.
Ábdimomyn Jeldibaevtyń «Erke sylqym kúıin» kóptegen eldiń ónersúıer qaýymy joǵary baǵalaǵan. Atalǵan týyndy AQSh-tyń áıgili Nıý-Iork shaharyndaǵy sýburqaqtarda jıi qoıylatynyn bireý bilse, bireý bilmes. Munyń ózi Ábdimomyn óneriniń qaı deńgeıde ekenine ólshem bola alsa kerek.
TARAZ