Saqyldaǵan sary aıazda Rýdnyı qalasynda jylý qubyry jarylyp, kóp qabatty 33 turǵyn úı, oǵan qosa sol mańaıda ornalasqan mektep, kolledj jáne balabaqsha jarty kún boıy jylýsyz qaldy.
30-qarasha kúni qalanyń 9-shaǵyn aýdanyndaǵy №6 jáne №4 turǵyn úılerdiń mańynda jylý magıstraly jarylǵany týraly sýyt habar tarap ketti. Sol kúni saǵat 16:43-te apatty joıý jumystaryn tıisti mekemeler baqylaýyna alǵanyn jarııa etken qalalyq ákimdik: «Turǵyn úıler men Gagarın kóshesindegi №17 jalpy bilim beretin mektep eki saǵatqa jylytý júıesine qaıta qosyldy. Dál qazir jarylǵan qubyrdyń sý ketip jatqan tusyn anyqtaý jumystary júrip jatyr. Mekteptegi aýa temperatýrasy 18-20 gradýs jyly, ekinshi aýysymda oqıtyn joǵarǵy synyptardaǵy sabaqtar qysqartyldy. Jaǵdaı tolyq baqylaýda», dep málimdedi.
Saǵat 17:30-da qala ákimdiginiń turǵyn-úı kommýnaldyq sharýashylyq bólimi jylý jelisindegi jaryqtyń anyqtalǵanyn, «Rýdnyı jylý jelileri» JShS-niń apattyq brıgadalary qubyrdy jedel bútindeý jumystaryn júrgizip jatqanyn habarlady.
Jarylǵan qubyrdy jóndeý jumystary keshki saǵat 21:00-de tolyq aıaqtalyp, 9-shaǵyn aýdandaǵy áleýmettik nysandar men turǵyn úıler birjola turaqty jylý júıesine qosyldy.
Turǵyndardyń aıtýynsha, qaladaǵy jylý qubyrlarynyń isten shyǵýy úırenshikti kóriniske aınalyp bara jatqan kórinedi. Osy kúzde «Rýdnyı jylý jelileri» seriktestiginiń mamandary da jylý joldarynyń ábden tozyp ketkenin málimdegen. Shaǵyn shaharda jylý beretin qubyrlardyń boıynda jylyna shamamen 300-deı apat tirkeledi eken.
Qostanaı oblysy,
Rýdnyı qalasy