El táýelsizdiginiń 30 jyldyǵy qarsańynda Erkeǵalı Rahmadıev atyndaǵy Memlekettik akademııalyq fılarmonııasynyń Kameralyq hory «Tal besikten – jer besikke…» atty teatrlandyrylǵan qoıylym usynǵan edi. Sahnalyq týyndyǵa degen alǵashqy áser rezonans týdyryp, joǵary baǵaǵa ıe boldy. Sol qoıylym araǵa jyl salyp, kúni keshe ǵana «Astana Opera» teatrynyń Kúlásh Baıseıitova atyndaǵy kameralyq zalynda kórsetildi.
Qazaqtardyń kúndelikti turmys-tirshiligi san túrli salt-dástúrlerge, otbasylyq, turmystyq ádet-ǵuryptarǵa toly. Osynyń bári rýhanı ómirinde kórinis tapqan ejelgi halyqtyń kúrdeli jáne biregeı etnıkalyq mádenıetin qalyptastyrady.
Qazirgi hor óneri halyq mýzykasy men ulttyq klassıka dástúrlerine, «Tal besikten – jer besikke...» qoıylymy da qazaqtyń dástúrli ádet-ǵuryptaryna negizdelgen. Qoıylymda ulttyń danalyǵyn, keńpeıildiligin, qonaqjaılyǵyn, fılosofııasy men dúnıetanymyn ashatyn salt-dástúrler men ádet-ǵuryptardyń ózindik kesheni dramatýrgııalyq turǵyda qurylǵan.
Hor ártisteri ulttyq kıimde, ulttyq naqyshtaǵy óleńderdi kórkemdep oqyp, Dáýletkereıdiń «Qamajaı», «Qosalqa» (óńdegen E.Korabeınıkova), «Qýyrmash» (óńdegen Á.Ábdinurov), E.Hasanǵalıevtiń «Kelshi, kelshi, balashym», Qurmanǵazynyń «Balbyraýyn» (óńdegen E.Abylaı), «On alty qyz» (óńdegen Ǵ.Berekeshov) jáne t.b. horǵa arnap óńdelgen qazaqtyń halyq ánderi men qazaqkompozıtorlarynyń shyǵarmalaryn oryndady. Konsertke Kameralyq hordyń oryndaýshylary Jubanysh Zetova, Indıra Aıtbergen, Abylaı Erbolat, Erkebulan Ábdiqalyqov, Mádı Aıtasov, Baqytgúl Shákim, Ǵazıza Júsipbekova, halyq áni bóliminiń ártisteri – Danııar Muqan, Sáýlejan Taǵzııa, О́zgeris Sherikbaı qatysty. Jetigen partııasyn «Saryarqa» halyq mýzykasy ansambliniń ártisi Qaragóz Gasımova oryndady.
Kameralyq hordyń kórkemdik jetekshisi jáne bas dırıjery – Qazaqstannyń eńbek sińirgen qaıratkeri, professor Gúlmıra Quttybadamova, dırıjer – Danara Tashatova, konsertmeıster – Gúlden Bazyken. Aıta keteıik, Kameralyq hor – halyqaralyq baıqaýlar men festıvalderdiń jeńimpazy, atap aıtsaq, «World Choir Games» eki altyn medali (Latvııa, 2014), «Shabyt» XVII halyqaralyq shyǵarmashyl jastar festıvaliniń bas júldesi, «Budapest International Choral Celebration» halyqaralyq hor festıvaline qatysý (Majarstan, 2015), «The Heart of Chorus – 2019» halyqaralyq festıvaliniń bas júldesi (Qytaı, 2019) jáne t.b. bar. Osy jeńisterdiń barlyǵy ujymnyń kásibıligi men sheberligin aıqyn kórsetedi.