«О́rleý» biliktilikti arttyrý ulttyq ortalyǵy» AQ dırektorlar keńesi 14 maýsymda Almaty qalasy boıynsha Kásibı damý ınstıtýtyn jabý týraly sheshim shyǵarǵan. Al Tóle bı, 298/4 mekenjaıynda ornalasqan «Ustazdar úıiniń» ǵımaratyn Bilim berý júıesiniń basshy jáne ǵylymı-pedagogıkalyq qyzmetkerleriniń biliktiligin arttyratyn respýblıkalyq ınstıtýtqa berý týraly sheshim qabyldanǵan.
Endigi kezekte Almaty qalasy boıynsha Kásibı damý ınstıtýtynyń qyzmetkerleri jumysyn osy ınstıtýt quramynda jalǵastyrady. Qazir fılıaldyń pedagogıkalyq quramy tolyǵymen jáne 5 qyzmetker jumysqa ornalasyp, 4 maman qysqarǵan.
Atalǵan jaǵdaıǵa baılanysty alańdaýshylyq bildirgen fılıal qyzmetkerleri jýrnalıstermen kezdesip, pikirlerimen bólisti. Fılıaldyń jabylýy týraly sheshimmen qyzmetkerler osy jyldyń 22 qarashasynda ǵana habardar bolǵan. Fılıaldyń bilikti mamandary jumyssyz qalýǵa alańdamaıdy. Alaıda qystyń kózi qyraýda jetken tosyn jańalyq 20 jyldan astam tájirıbesi bar mamandardyń erteńge degen seniminen aıyryp otyr. Endi qolǵa alǵan jobalardyń barysy qalaı bolady degen fılıal qyzmetkerleri «Ustazdar úıiniń» qalypty jaǵdaıda jumysyn jalǵastyrǵanyn qalaıdy.
«О́rleý» biliktilikti arttyrý ulttyq ortalyǵy» AQ fılıalynyń Almaty qalasy boıynsha dırektory, pedagogıka ǵylymdarynyń doktory Raısa Sadvakasova atap ótkendeı, muǵalimderdiń biliktiligin arttyrý maqsatynda qurylǵan 60 jyldyq tarıhy bar «Ustazdar úıiniń» mamandary osy jyldar ishinde biliktilikti, kásibı quzyrettilikti arttyrýda kóptegen jobanyń uıytqysy bolyp keldi. Bıyl 6 myńǵa jýyq muǵalim biliktilik kýrstarynan ótken. Ortalyqta 41 maman jumys isteıdi. Muǵalimderge ádistemelik qoldaý kórsetý, mektepke deıingi, jalpy bilim berý jáne kolledjderdiń oqytýshylarymen birlesip jumys isteý de fılıal mamandary úshin dástúrli sharaǵa aınalǵan.
«Fılıal memlekettik tapsyrysty oryndaýmen qatar basqa da jobalarmen aınalysyp keldi. Fılıal mamandary bıyl 27 mln teńgege aqyly kýrstar ótkizgen. Sonymen qatar AQSh elshiligi, EQYU granttyq jobalary aıasynda aǵylshyn tili kýrstary, az sandy halyqtar tilderin qoldaý boıynsha jobalarǵa qatysty. 2019 jyldan bastap orys tilindegi balabaqshalarmen kelisimshartqa otyryp, qazaq tilin oqytý boıynsha ádistemelik qoldaý kórsetip keledi. Bıyl EQYU-men birlesip, aımaqtyq mektepter jobasyn iske asyrdy. Búginde fılıal jumysynan Ortalyq Azııa aımaǵy habardar. Saha Respýblıkasy, Tájikstan, Qyrǵyzstan, Mońǵolııa pedagogteriniń biliktiligin arttyra otyryp, qazaq dıasporalary turyp jatqan elderde qazaq tilin oqytýdyń ádistemesi úıretildi. Pandemııa kezinde Qyrǵyzstannyń respýblıkalyq biliktiligin arttyrý ınstıtýtymen jáne Mońǵolııanyń muǵalimderi úshin tildi oqytýdyń ıntegrasııalanǵan kýrsy qashyqtan oqytyldy», dedi R.Sadvakasova.
Biz «О́rleý» BAUO» AQ fılıaly Almaty qalasy boıynsha Kásibı damý ınstıtýtynda iske asqan jobalardyń birqataryn ǵana tilge tıek etip otyrmyz. Instıtýt mamandarynyń aıtýynsha, endigi kezekte pedagogıkalyq ujymdarmen jasalǵan kelisimsharttar aıaqtalmaı qalýy yqtımal. Fılıal jumysynyń ári qaraı toqtaýsyz jalǵasyn tabatynyna senim bildirgen aǵa oqytýshy, halyqaralyq trener Larısa Petrova búginde ustazdar qaýymy úshin turaqtylyq pen qoldaýdyń mańyzdy ekenin alǵa tartsa, kafedra meńgerýshisi Janar Ibraeva gýmanıtarlyq pán muǵalimderiniń biliktiligi boıynsha jobalarǵa toqtaldy. Onyń aıtýynsha, kafedrada bilikti, tájirıbesi mol halyqaralyq sertıfıkattardyń ıegerleri, oqýlyq avtorlary birlesip jumys istep keledi. Osy oraıda fılıalda iske asqan jobalar jalǵasyn tabýy úshin jarty ǵasyrdan astam tarıhy bar ınstıtýttyń jumysy jandanýy qajet dep sanaıdy. Búginge deıin júıelenip, bir baǵytqa túsken kóptegen jobanyń toqtap qalýyna alańdaýshylyq bildire kelip, qala muǵalimderi úshin de bul qıyn kezeń ekenin atap ótti. О́ıtkeni muǵalimder jyl on eki aı ádistemelik semınarlar, kóshpeli sabaqtar, sheberlik saǵattary aıasynda óz biliktilikterin shyńdap kelgen edi. Birlesken avtorlyq jumystar, ádistemelik nusqaýlyqtar da ázirlendi.
Bólim basshysy Aıda Otynshına «Pedagogter mártebesiniń artýymen belgili bir sebeptermen ketip qalǵan qanshama bilikti muǵalimder bilim berý salasyna qaıta oraldy. Fılıal mamandary muǵalimderdi qaıta oqytyp, biliktiligin kóterýge yqpal etti. Osy jyldarda qalyptasqan oqytý júıesi, trenerlerdiń eńbegi esh ketpese eken. Qıyndyqtardy artqa tastaı otyryp, qol jetken nátıjemizde qanshama mamannyń eseli eńbegi jatyr», degen oıymen bólisse, bas ádisker Perýza О́zenbekqyzy qyzmetkerlerdiń eńbegin áp-sátte joqqa shyǵaryp, 60 jyldan asa tarıhy bar ınstıtýtty jabý úlken qatelik dep sanaıdy. «Osy jyldarda mańdaı terin tóge júrip fılıal qyzmetkerleri ıgi jobalardy iske asyrdy. Qalyptasqan dástúrli júıeni buzbaı, kerisinshe qoldaý kórsetip, úlgi-ónegesin taratyp, damytsa, muǵalimderdiń biliktiligin arttyrýda úlken jetistik bolar edi. Instıtýtty jabý dástúrli júıeni buzýmen para-par», deıdi P.О́zenbekqyzy.
2016 jyly jańa ǵımaratqa kóshken ınstıtýt mamandary zamanaýı úlgide jabdyqtalǵan keńselerde muǵalimderdiń bilim alýyna, tájirıbe jınaqtaýyna barynsha qoldaý kórsetip keledi. «О́rleýdiń» bastamasymen atqarylǵan izgi de ıgi is-sharalar muǵalimderdi jańashyldyqqa jeteledi. Pandemııa kezinde respýblıka muǵalimderiniń qashyqtan oqý rejiminde tıimdi jumys isteýine «О́rleý» mamandarynyń eńbegi zor. Mundaǵy robottehnıka, montessorı kabınetteri, kitaphana jáne murajaı ǵımarattyń zaman aǵymyna saı ekeniniń dáleli bolsa kerek.
«Almaty fılıalyn jabýǵa nelikten osyndaı sheshim qabyldandy?» degen saýalymyzǵa oraı «О́rleý» BAUO» AQ basqarma tóraǵasy Ásel Muhametjanova: «Bul – naqty tujyrym emes. Biz «О́rleý» biliktilikti arttyrý ulttyq ortalyǵy eki fılıalynyń birigýi týraly aıtyp otyrmyz, sonymen qatar 100 paıyz memleket qatysatyn aksıonerlik qoǵambyz. Qazir Almatyda eki fılıal bar. Biri mektep, balabaqsha dırektorlarynyń biliktiligin arttyrsa, ekinshisi pedagogterdi oqytady. Eki bólek uıymnyń ákimshilik jáne basqa da shyǵystary bar, eki fılıaldy ustaý bıýdjetke aýyrtpalyq ákeletinimen kelisersiz. Bul eki fılıal úlken shyǵyndy qajet etedi, jyl saıynǵy shyǵyn 100 mln teńgeden asady. Sondyqtan fılıaldar biriktirý arqyly ońtaılandyryldy. Osylaısha, ákimshilik shyǵystary qysqartylady. Bul sheshim «Aksıonerlik qoǵamdar týraly» zań men bizdiń uıymnyń jarǵysy negizinde qabyldandy. Iаǵnı Dırektorlar keńesi Almaty qalasy boıynsha ınstıtýtty jabý jáne fýnksııasyn Respýblıkalyq kásibı damý ınstıtýtyna berý týraly sheshim qabyldady», dep jaýap berdi.
ALMATY