Bıznestiń órisi keńeıedi

Qazaqstannyń Ortalyq kommý­nı­kasııalar qyzmetinde Parla­ment Senatynyń depýtattary Aqan Bıjanov pen Vladımır Bobrov­tyń qatysýymen brıfıng uıymdas­tyrylyp, onda eýrazııalyq ıntegrasııa jaıynda áńgime qozǵaldy. A.Bıjanov Eýrazııalyq ekonomıkalyq odaq qurý týraly shartqa qol qoıý elder arasyndaǵy tarıhı oqıǵa bolyp sanalatynyna, bul baǵytta memlekettik organdar tarapynan aýqymdy jumystar atqarylǵanyna toqtaldy. «Eýrazııalyq ekonomıkalyq odaqtyń qurylýy ishki naryqtyń aýqymyn keńeıtýge múmkindik beredi. Búginde úsh eldiń ortaq naryǵy 2,5 trln.-nan astam AQSh dollaryn qurap otyr. Al jalpy adam resýrstary – 168 mln.- ǵa jýyq. Memleketterdiń jalpy óndiristik áleýeti 600 mlrd. AQSh dollaryn kórsetedi. Demek, bizdiń elderimizdiń arasyndaǵy ıntegrasııalyq úderisterdiń júzege asýy, túrli ekonomıkalyq kedergiler men shekteýlerdiń alynyp tas­talýy ár memlekettiń bıznes aınalymyn keńeıtýge múmkindik beretin bolady. Bul rette, Qazaqstan, Belarýs jáne Reseı memleketteriniń bıznesi memlekettik satyp alýlar júıesinde teń jáne básekelestik quqyqqa ıe bolatynyn da atap ótken jón. Bul óz kezeginde tasymaldyń, taýarlar men qyzmet kórsetýlerdiń aýqymdy naryǵyn qurýǵa jol ashpaq», dedi ol. Senat depýtatynyń aıtýynsha, Qazaqstannyń ózge eldermen áriptestik ornata otyryp, óziniń ekonomıka salasyn birneshe baǵytta damytýyna múmkindigi bar. Olar munaı jáne munaı ónimderiniń, gaz ben elektr energııalarynyń, dári-dármekter men medısınalyq ónimderdiń ortaq naryǵy bolmaq. Buǵan qosa, «úshtik» elderi arasyndaǵy taýar aınalymyn odan ári ulǵaıtý kózdelmek. Máselen, 2013 jyly memleketter arasyndaǵy taýar aınalymy 24 mlrd.-tan astam AQSh dollaryn qurapty. «Bul – Qazaqstan sekildi teńizge tikeleı shyǵar joly joq elge kólik-logıstıkalyq júıesiniń áleýetin arttyrýǵa da múmkindik beretin bolady. Eldiń ınvestısııalyq tartymdylyǵy da artpaq. Máselen, qazirgi tańda sheteldik sarapshylar elimizde bıznestiń óristeýi úshin jaqsy jaǵdaı jasalyp otyrǵanyn aıtýda. Iаǵnı, bizde salyq saıasatyna, túrli kedergilerdiń alynyp tastalýyna qatysty basymdyqtar men artyqshylyqtar bar. Demek, úsh eldiń qarjylyq múmkindikterin biriktirý arqyly ulttyq-qarjylyq júıeniń turaqtylyǵy men bizdiń ekonomıkalarymyzdyń tetigin nyǵaıtý kózdelmek», dedi depýtat bul týrasynda. Al V. Bobrov qoǵamda áleýmettik turaqtylyq pen myqty ekonomıkalyq tetik ornamaıynsha, kez kelgen eldiń jahandaný zamanyndaǵy básekelestikke tótep bere almaıtynyn alǵa tartty. «Alǵashynda Keden odaǵyna qatysty synı pikirler kóp aıtylǵanyn bilemiz. Alaıda, ol shaǵyn jáne orta bıznes úshin óziniń tıimdiligin kórsetip berdi. Endi biz bul kezeńnen kóterilip, ıntegrasııalyq úderisti ekonomıkalyq yqpaldastyq aıasynda júrgizýge múmkindik alyp otyrmyz», dedi ol. Senator, sondaı-aq, Eýrazııalyq ekonomıkalyq odaq qurý týraly shartqa qol qoıý Elbasy Nursultan Nazarbaevtyń muqalmas erik-jigeriniń arqasynda múmkin bolǵanyn atap kórsetti. Brıfıng sońynda depýtattar jýrna­lıs­terdiń qoıǵan saýaldaryna jaýap berdi. Láıla EDILQYZY, «Egemen Qazaqstan».