Týnıste jasóspirimder arasyndaǵy álem birinshiligi aıaqtaldy. Bul jarysta 15 jastaǵy qazaqstandyq sportshy Alan Qurmanǵalıev ta baq synady. Mysyrlyq Hana Godamen birge ol aralas jup saıysynda bas júldeni oljalady.
Jerorta teńizi jaǵalaýynda jalaýy jelbiregen jarysqa Alan Qurmanǵalıev pen Hana Godanyń óte jaqsy daıarlyqpen kelgeni birden baıqaldy. Ekeýi de biraz jyldan beri óz elderiniń ulttyq qurama komandasy sapynda óner kórsetip júr. Máselen, Alan bıyl Laosta ótken Azııa birinshiliginde qola medal enshiledi. Bul – Qazaqstannyń osyndaı deńgeıdegi jarystaǵy alǵashqy júldesi. 14 jastaǵy Hana da Afrıka qurlyǵyndaǵy eń úzdik jas oıynshylar sanatyna erkin enip otyr. Bul sportshylardyń basqa da asa iri halyqaralyq týrnırde eleýli tabystarǵa qol jetkizip júrgenin jankúıerler jaqsy biledi. Týnıste Qurmanǵalıev pen Goda juby barlyq qarsylasyn sypyra utyp, fınalda Pıreneı túbeginen kelgen Tıago Abıodana men Marııa Berzostan basym tústi.
– Bul – Qazaqstan ústel tennısi úshin tarıhı sát! Buǵan deıin osy sport túrin serik etken eshbir jerlesimiz dál osyndaı zor tabysqa qol jetkizgen joq edi. Alan óziniń eńbekqorlyǵy men tabandylyǵynyń arqasynda búgingideı dárejege jetti. Ol jyl basynan beri nátıjeli óner kórsetip, túrli halyqaralyq jarysta barlyǵy 19 medal jeńip aldy. Mine, endi álem chempıony atanyp otyr. Osylaısha, Qazaqstan bul ónerde jańa deńgeıge kóterildi. Sóz oraıy kelgende, osyndaı myqty sportshyny tárbıelegen jeke jattyqtyrýshysy Elmıra Álıevaǵa zor rızashylyǵymdy bildiremin. Al Alannyń ózin osy jarqyn jeńisimen qutttyqtaımyn, – deıdi respýblıkalyq ústel tennısi federasııasynyń prezıdenti Danııar Abylǵazın.