Tarazda qazaq mýzykasynyń korıfeıi, «Jaılaýkól keshteri», «Edil men Jaıyq», «Danııardyń áni», «Jámılániń áni» sekildi kóptegen týyndylary án áleminde altyn árippen jazylǵan Qazaqstannyń Eńbek Eri, dańqty kompozıtor Ilııa Jaqanovtyń «Jaılaýkól keshteri» atty shyǵarmashylyq keshi ótti.
Is-shara barysynda Balasaǵun atyndaǵy ortalyq konsert zalǵa jınalǵan jurtshylyqqa úsh birdeı jınaq tanystyryldy. Jańadan jaryq kórgen kitaptardyń qatarynda óner janashyry Qanat Ordabaevtyń demeýshiligimen jaryq kórgen Ilııa Jaqanovtyń shyǵarmalary engen «Jaılaýkól keshteri» atty jınaq bar. Odan bólek, jazýshy-jýrnalıst Qalı Sársenbaıdyń qalamynan týǵan «Dúldúl», Ilııa Jaqanovtyń ózi jazǵan «Tańǵajaıyp mahabbat» sekildi jınaqtar da oqyrman úshin úlken olja ekeni ras.
Ilııa Jaqanovtyń jan tebirentetin ánderimen ádiptelgen kesh barysynda óńir basshysy Nurjan Nurjigitov sóz alyp, daraboz tulǵaǵa izgi tilegin jetkizdi.
«Qazaqtyń baıtaq dalasyn án-kúıge bólegen Birjan sal, Aqan seri, Qurmanǵazy, Yqylas, HH ǵasyrdyń korıfeıleri Shámshi men Nurǵısa sekildi óner dúldúlderiniń qasıetti jolyn jalǵaǵan qazaqtyń mańdaıaldy kompozıtorymen qaı kezde de maqtanamyz», dedi oblys ákimi.
Kesh barysynda óner juldyzdary kompozıtordyń halyqqa keń taraǵan ánderin shyrqady. Kórermenniń esine kezinde hıt bolǵan ánderdi saldy. «Jaılaýkól keshteri» saǵynyshtyń sazyna aınaldy.
Taraz