Ál-Farabı atyndaǵy Qazaq ulttyq ýnıversıtetinde «Taqsaı hanshaıymy» jáne «Úrjar sáýegeıi» eskertkishteriniń kórmesi ashylyp, «Tarıhı-mádenı mura nysandaryn qalpyna keltirý jáne rekonstrýksııalaý» taqyrybynda halyqaralyq ǵylymı-tájirıbelik konferensııa ótti.
Belgili sýretshi-restavrator Qyrym Altynbekovtiń 70 jyldyǵyna arnalǵan shara aıasynda ǵalymdar elimizdiń arheologııa restavrasııa salasyndaǵy ozyq jetistikterdi saralap, Qazaqstan Sýretshiler akademııasynyń prezıdenti Amandos Aqanaev, Marǵulan atyndaǵy Arheologııa ınstıtýtynyń dırektory Aqan Ońǵar jáne Ortalyq memlekettik mýzeıdiń, «Tańbaly» qoryq-mýzeıiniń, «Esik» mýzeıiniń, «Berel» mýzeıi ǵalymdary mazmundy baıandamalar jasady.
Konferensııa qatysýshylary Qyrym Altynbekov jańartqan tarıhı-mádenı jádigerler kórmesin tamashalady. Elimizdiń ejelgi jáne ortaǵasyrlyq tarıhynan syr sherter arheologııalyq qundy jádigerlerdi «Qyrym araly» ǵylymı zerthanasy mamandary asqan sheberlikpen zamanaýı sıpatta kópshilik nazaryna usynyp keledi.
Kórkem-tarıhı jádigerlerdiń arasynan «Taqsaı hanshaıymy» men «Úrjar sáýegeıi» erekshe kózge túsedi. 2012-2013 jyldary Oral qalasynan on bes shaqyrym jerde Taqsaıdan tabylǵan qorymnan hanshaıymmen birge kóptegen jádiger arshylyp alynyp, otandyq arheologııadaǵy tyń jańalyq ári mańyzdy ekspozısııa retinde málim bolǵany belgili. Bizdiń zamanymyzǵa deıin IV-III ǵasyrlarda ómir súrgen «Úrjarlyq sáýegeı áıel» 2013 jyly Shyǵys Qazaqstan oblysy Úrjar aýdany aýmaǵynda arheolog Tımýr Smaǵulovtyń jetekshiligimen júrgizilgen qazba jumystary kezinde tabylyp, «Qyrym araly» mamandary sáýegeı áıeldiń syrt kıimi men bas kıimin tolyqtaı qalpyna keltirgen bolatyn. Áshekeıler ishinde sáýkelege uqsas bas kıim de erekshe nazar aýdartady. Ǵalymdar altyn «múıiz» oıý-órnekpen bezendirilip, baǵaly tastarmen kómkerilgen qundy jádiger hanshaıymnyń bas kıimi bolǵan degen tujyrym aıtady.
ALMATY