Qamaýda otyrǵan Grýzııanyń burynǵy prezıdenti Mıhaıl Saakashvılı Fransııa prezıdenti Emmanýel Makronǵa hat joldady, dep habarlaıdy Egemen.kz.
Hatta Saakashvılı Makronnan kómek surap, óziniń az ǵana ǵumyry qalǵanyn aıtqan.
«Men ómir boıy Grýzııa men Ýkraınadaǵy bostandyq pen reformalar úshin kúrestim, Reseıdiń ımperıalıstik saıasatyna qarsy boldym. Pýtın meni óziniń basty jaýlarynyń biri sanaıdy. Ol meni óltiremin dep jurt aldynda ýáde berdi. Qazir men onyń jeke tutqyndarynyń biri retinde túrmede otyrmyn. Toksıkologtar meni túrmede ýlanǵan degen qorytyndyǵa keldi», delingen hatta.
Saakashvılıdiń densaýlyǵyna dárigerler de alańdaýshylyq bildirgen.
«Men salmaǵymnyń úshten birin joǵalttym, qozǵala almaımyn. Maǵan halyqaralyq deńgeıde reaksııa kerek, óıtkeni men ólip baramyn. Ýaqytym az», dep jazdy Saakashvılı.
Grýzııanyń eks-prezıdenti sonymen qatar prezıdent Makron men Fransııa halqynan úmit kútetinin aıtqan.
Aıta keteık, mundaı aqparat Georgia-Online saıtynda jáne «Anadoly» agenttiginde jarııalanǵan.