Pavlodarda jaıaý júrginshiler ótkelinde qoqys tógetin júk kóligi eki oqýshyny qaǵyp ketti. Bir bala alǵan jaraqattarynan aýrýhanada kóz jumdy, dep habarlaıdy Egemen.kz.
Oqıǵa ornynan túsirilgen vıdeony oqıǵa kýágerleri Instagram jelisinde jarııalady. Kadrlardan bir balanyń «Jaıaý júrginshiler ótkeli» belgisinen birneshe metr jerde qardyń ústinde jatqanyn kórýge bolady.
Pavlodar oblysynyń polısııa departamenti baspasóz qyzmetiniń habarlaýynsha, 13 jeltoqsanda Pavlodar qalasynyń Soltústik ındýstrııalyq aımaǵynda jol-kólik oqıǵasy boldy.
«ZIL avtokóliginiń 44 jastaǵy júrgizýshisi rettelmeıtin jaıaý júrginshiler ótkelinde joldy kesip ótip bara jatqan kámeletke tolmaǵan eki balany qaǵyp ketti. Qazirgi tańda atalǵan fakti boıynsha tergeý amaldary júrip jatyr», dep habarlady oblystyq PD baspasóz qyzmetinen.
Eki bala da jaraqatpen aýrýhanaǵa jetkizildi.
Pavlodar oblysy densaýlyq saqtaý basqarmasynyń baspasóz qyzmetinen túsken málimetke qaraǵanda, 2012 jyly týǵan ul balanyń oń jaq aıaǵynyń súıegi synǵan. Ol travmatologııa bólimshesine jatqyzyldy, jaǵdaıy ortasha.
«2010 jyly týylǵan ekinshi jaraqat alǵan oqýshy jambas súıekteriniń kóptegen synyqtary, ishki aǵzalarynyń zaqymdanýy, ishki qan ketý jáne shap aımaǵyndaǵy kólemdi jaralarmen tústi. Alǵan jatarqattaryna baılanysty bala aýrýhanaǵa jetkizilgennen keıin 18 mınýttan soń qaıtys boldy», dep habarlady vedomstvodan.