Memleket basshysy Qazaqstannyń halyq ártisi Bolat Aıýhanovtyń otbasy men týystaryna kóńil aıtý jedelhatyn joldady, dep habarlaıdy Egemen.kz Prezıdenttiń baspasóz qyzmetine silteme jasap.
Memleket basshysy kórnekti mádenıet qaıratkeri, balet ártisi, horeograf, Qazaqstannyń halyq ártisi Bolat Aıýhanovtyń qaıtys bolýyna baılanysty onyń otbasy men jaqyn týystaryna kóńil aıtty. – Erekshe shyǵarmashylyq daryn ıesi, óner maıtalmany Bolat Ǵazızuly otandyq mádenıet salasy men horeografııa óneriniń damýyna ólsheýsiz úles qosty. Búginde Qazaqstan Respýblıkasynyń Memlekettik akademııalyq bı teatry retinde tanylǵan kórkemdik ujymnyń negizin qalap, oǵan uzaq jyldar boıy jetekshilik etti. Onyń balet ónerindegi týyndylary elimizdiń jáne shetel sahnalarynda qoıyldy. Bolat Ǵazızuly qashanda adamgershilik jáne rýhanı qundylyqtardan aınymaı, ónerge qyzmet etti, bilimi men tájirıbesin jas býynǵa úıretti. Bolat Ǵazızulynyń jarqyn beınesi júregimizde máńgi saqtalady, – dep jazylǵan kóńil aıtý jedelhatynda.