«Amanat» partııasynyń Atqarýshy hatshysy Ashat Oralov Bas prokýratýranyń jer salasyndaǵy zańdylyqty saqtaý máseleleri jónindegi alqa otyrysyna qatysty.
Memleket basshysy Qasym-Jomart Toqaev Úkimet pen Bas prokýratýraǵa paıdalanylmaı jatqan aýyl sharýashylyǵy jerlerin memleketke qaıtarýdy tapsyrǵan bolatyn.
Búginde elimizde paıdalanylmaı jatqan 5 mln ga jer memleket menshigine qaıtaryldy. Onyń 3 mln ga-dan astamy – «Amanat» partııasy janynan qurylǵan «Jer amanaty» qoǵamdyq komıssııasynyń aralasýymen qaıtarylyp otyr. Alqa otyrysynda partııanyń Atqarýshy hatshysy jer salasyndaǵy zańdylyqty jetildirý jóninde birqatar bastama kóterdi.
«Biz jer máselesinde jańa olıgopolııaǵa jol bermeýimiz qajet. «Amanat» partııasy bul istiń atqarylýyna qoǵamdyq baqylaýdy kúsheıtedi. Memleket menshigine qaıtarylǵan jerdiń halyqqa ádil bólinýine qatań baqylaý júrgizý kerek. Eń aldymen aýyldyń aınalasyndaǵy jerlerdi halyqqa qaıtaryp berý qajet. Aýyl tóńiregi áý bastan mal jaıylatyn jer sanalady. Sondyqtan aýyl azamattary bul jerdi ortaq paıdalanýǵa tıis», dedi Ashat Oralov.
Sondaı-aq Atqarýshy hatshy aýyl aınalasyndaǵy 5-10 shaqyrym radıýstaǵy jerdi sol aýylda turmaıtyn azamattardyń menshigine berýge zań júzinde tyıym salý qajet ekenin atap ótti. «Jer amanaty» komıssııasy memleket menshigine qaıtarylǵan jer ýchaskeleriniń tizbesin kórsetetin ınteraktıvti karta ázirlep jatqanyn jetkizdi.
Alqa otyrysynda Bas prokýror Berik Asylov bıyl qoǵamdyq jaıylymdardyń tapshylyǵy 29 mln ga-dan 8 mln ga-ǵa deıin qysqartylǵanyn atap ótti. Soltústik Qazaqstan, Aqmola jáne Almaty oblystarynda 11 myń úleskerge 500 myń ga-dan astam jer qaıtaryldy. Tekseris kezinde olıgopolııalardyń qoldanýyndaǵy eń jaqsy jáne qunarly aýylsharýashylyq jerlerin, jaıylymdar men kommersııalyq ýchaskelerdi anyqtaldy.
Sondaı-aq Bas prokýror ýákiletti organdardyń jaıylym jerlerin oń basqarýdyń, iri jer telimderdiń bir qolǵa shoǵyrlanýyna jol bermeý jáne úlestik jerlerge baqylaýdy kúsheıtýdiń mańyzdylyǵyna nazar aýdardy.