Senator Bekbolat Orynbekov elimizdiń Premer-Mınıstriniń atyna joldaǵan depýtattyq saýalynda Jambyl oblysynyń Qordaı aýdanyndaǵy elektr energııasynyń tapshylyǵy týraly problemany kóterdi, dep habarlaıdy Egemen.kz.
Depýtattyń aıtýynsha, qazirgi ýaqytta Qordaı aýdanynda elektr energııasynyń jetispeýi óte qatty baıqalyp otyr. Senator atap ótkendeı, elektr energııasynyń 90%-y kórshi Qyrǵyz Respýblıkasynan alynady.
Aýdan aýmaǵynda iri kásiporyndar bar, olardyń qyzmeti de elektr energııasyna baılanysty. Mysaly, Qazaqstan-Qyrǵyz shekarasyndaǵy avtojol ótkizý pýnktteriniń aımaǵynda salynyp jatqan ındýstrııalyq-saýda-logıstıkalyq keshendi aıtýǵa bolady.
Senator bul máseleni «Qordaı 220» elektr stansııasyn salý arqyly sheshýge bolady dep esepteıdi. Depýtattyń aıtýynsha, stansııa salynsa aýdan turǵyndarynyń elektr energııasyna táýeldi bolýy máselesi sheshiledi ári áleýmettik jáne kásipkerlik nysandardy senimdi elektr qýatymen qamtamasyz etiletin bolady.
«Búgingi tańda Qordaı aýdanynda qýaty 63 MVt qosalqy stansııasy men joǵary voltty áýe jelisin salý boıynsha, memlekettik saraptamanyń oń qorytyndysy alynyp, jalpy quny 21 mlrd teńgeni quraıtyn joba daıyndaldy. Ol júzege asqan jaǵdaıda, josparlanǵan jáne qurylysy júrip jatqan nysandardy elektr energııasymen tolyq qamtamasyz etip qana qoımaı, tarıf qunyn tómendeýine de septigin tıgizedi», dedi senator.
Bekbolat Orynbekov osyǵan baılanysty Premer-Mınıstr Álıhan Smaıylovtan osy máseleni sheshýge járdemdesýdi, atap aıtqanda, Jambyl oblysynyń Qordaı aýdanyn elektr energııasymen qamtamasyz etý úshin respýblıkalyq bıýdjetten qajetti qarjyny bólýdi surady.