Túrkııa soty Ystanbul qalasynyń ákimin eki jyl jeti aıǵa bas bostandyǵynan aıyrdy, dep habarlaıdy Egemen.kz Daily Sabah basylymyna silteme jasap.
Ystanbul meri Ekrem Imamoglý úsh jyl buryn saılaý nátıjeleriniń joıylýyn «aqymaqtyq» dep ataǵannan keıin aıyptaldy. Sot muny Joǵarǵy saılaý komıssııasynyń múshelerin qorlaý dep sanady.
52 jastaǵy Imamoglý túrik oppozısııasynyń ókili jáne aldaǵy maýsymda ótetin saılaýda Túrkııanyń qazirgi prezıdenti Rejep Taıyp Erdoǵannyń basty básekelesteriniń biri.
Alaıda, sot sheshimine sáıkes, endi Imamoglýǵa saıası qyzmetpen aınalysýǵa da tyıym salyndy, bul ony eldegi prezıdenttik saılaýǵa qatysý múmkindiginen is júzinde aıyrady.
Úkim men saıası tyıymdy apellıasııalyq sot rastaýy kerek. Eger joǵary organ úkimdi qoldasa, Ekrem Imamoglý bes jyl kóleminde saıası qyzmetpen aınalysa almaıdy. Sondyqtan ol Ystanbul meri qyzmetinen bosatylýy múmkin. Aıyptaýshy tarap Ekrem Imamoglýdy tórt jyl bir aıǵa bas bostandyǵynan aıyrýdy surady.
Ekrem Imamoglý sotqa shaǵymdanatynyn aıtty. Qazir apellıasııa qaralyp jatqandyqtan ol qalany basqarýdy jalǵastyra beredi.