El ekonomıkasynyń damýyna «Qorǵas-Shyǵys qaqpasy» arnaıy ekonomıkalyq aımaǵyndaǵy «Qazaqstan-Qytaı halyqaralyq ónerkásiptik qalasy» jobasynyń mańyzy zor. Osy rette Jetisý oblysynyń ákimi Beıbit Isabaev ınvestorlarmen onlaın rejimde kezdesti. Buǵan deıin qarasha aıynda ótken jıynda qol jetkizilgen kelisimge sáıkes taraptar uzaq merzimdi yntymaqtastyqty júzege asyrý týraly memorandýmǵa qol qoıdy.
Jetisý oblysy ákimdigi baspasóz qyzmetiniń málimetinshe, ınvestısııanyń jalpy kólemi 1 trln teńgeden asady. Bul oblystyń úshjyldyq bıýdjetine teń. Kezdesýde óńir basshysy el Prezıdenti Qasym-Jomart Toqaevtyń osy jobany damytýǵa erekshe nazar aýdaryp otyrǵanyn atap ótti.
«Memleket basshysy bizdiń óńirge kelgen saparynda Qytaımen iskerlik jáne saýda-ekonomıkalyq baılanystardy nyǵaıtyp, keńeıte túsýge baǵyttalǵan atalǵan mańyzdy jobany qaıta bastaý sharalaryn qabyldaý týraly tapsyrma berdi. «Qazaqstan-Qytaı ónerkásiptik qalasy» jobasy Qazaqstan-Qytaı ındýstrııalyq-ınnovasııalyq yntymaqtastyq jobalarynyń tizbesine engizilgen, sondaı-aq bul jobanyń eki eldiń Úkimetteri arasynda «Jibek jolynyń ekonomıkalyq beldeýin» salýda eleýli máni bar. Búgingi memorandým jobany iske asyrýdyń jańa kestesin bekitip, ony júzege asyrýǵa baılanysty buǵan deıin josparlanǵan barlyq is-sharany qaıta bastaýǵa múmkindik beredi», dedi B.Isabaev. Sondaı-aq ol «Qazaqstan-Qytaı ónerkásiptik qalasy» aıasynda josparlanǵan 30 ınvestısııalyq joba jaıynda jáne olardy iske asyrý merzimderi týraly málimetterdi surap bildi.
«Qytaı-Qazaqstan halyqaralyq ónerkásiptik qalasynyń» basqarma tóraǵasy I Fadjýn men «Fujian Dazhuo» basqarma tóraǵasy Lın Sıaov ózderine qoldaý kórsetkeni úshin qazaqstandyq tarapqa alǵys bildirdi. Sonymen qatar jobany iske asyrýǵa qatysatyn kompanııalardyń tizimimen qosa barlyq qajetti aqparatty ýaqtyly beremiz dep sendirdi. Olar jeltoqsan aıynyń sońyna deıin Jetisýǵa kelip, jeke kezdesý barysynda barlyq málimetti júzbe-júz otyryp talqylaı alatyndaryna úmitti. Oǵan qazirgi ýaqytta QHR aýmaǵynda koronavırýstyń qaıta órshýi kedergi keltirýde. Sondyqtan barlyq kezdesý ázirge onlaın rejimde ótkiziledi.
Memorandýmǵa qol qoıýǵa qatysty pikirin bildirgen Beıbit Isabaev «Qazaqstan-Qytaı ónerkásiptik qalasy» jobasy eki el arasyndaǵy saýda-ekonomıkalyq qana emes, tehnologııalyq salalardaǵy ekijaqty yntymaqtastyqty damytýdyń jańa múmkindikterine jol ashatynyn atap ótti. Bolashaq logıstıkalyq tehnoparkte jańa óndirister, damyǵan ınfraqurylym, aýyl sharýashylyǵy ónimderin óńdeý kásiporyndary, saýda-oıyn-saýyq obektileri, fýdkorttar jáne t.b. nysandar bolady. Iаǵnı jańa jumys oryndary ashylady, zamanaýı tehnologııalar qoldanysy keńeıedi, oblys bıýdjetine túsetin salyq túsimderi molaıady degen sóz. Bul joba 1-2 jyldyq emes, onyń aldaǵy perspektıvalaryn eskersek, onyń geostrategııalyq mańyzy úlken.
Kezdesýdi aıaqtaı kele taraptar uzaq merzimdi ózara tıimdi seriktestikke múddeli ekendikterin aıtty, ıaǵnı pandemııanyń saldarynan eki jylǵa jýyq toqtap turǵan jobany iske asyrýǵa bar kúsh-jigerlerin salmaq.
Oblys ákimi B.Isabaevtyń aıtýynsha, kelesi aptada óńirge resmı saparmen Shyńjań Uıǵyr avtonomııalyq aımaǵynyń delegasııasy keledi. Iri ınvestor kompanııamen memorandýmǵa qol qoıý josparlanyp otyr. Eske salsaq, osy jyldyń qyrkúıek aıynyń basynda «Qazaqstan-Qytaı yntymaqtastyǵy jónindegi dostyq dıalogi» onlaın kezdesýi aıasynda Shyńjań óńiri men Jetisý oblysy arasynda baýyrlastyq baılanys ornatý jónindegi nıet týraly hattamaǵa qol qoıylǵan bolatyn.
Jetisý oblysy