130 kandıdat usynyldy

Qazaqstan Respýblıkasy Parlamenti Senaty depýtattarynyń kezekti saılaýy 2023 jylǵy 14 qańtarda ótetini belgili. Ortsaılaýkom tóraǵasynyń mindetin atqarýshy Konstantın Petrov 2022 jylǵy 29 qarashadan 14 jeltoqsanǵa deıin respýblıka boıynsha joǵarǵy palatanyń 20 ornyna 130 kandıdat usynylǵanyn atap ótti. Salystyrmaly túrde alatyn bolsaq, 2020 jyly Senatqa kezekti saılaýǵa – 94 kandıdat, 2017 jyly – 89 kandıdat, 2014 jyly – 88, 2011 jyly 96 kandıdat tirkelgen bolatyn.

О́ńirler arasynda eń kóp úmitker Abaı, Batys Qazaqstan, Qyzylorda oblystarynda – 8, Almaty men Astana qalalarynda – 10 adamnan usynyldy. Eń azy – 5 úmitkerden Aqmola, Aqtóbe, Almaty, Shyǵys Qazaqstan, Jambyl, Qostanaı, Pavlodar, Soltústik Qa­zaq­stan oblystarynda jáne altaýy Shymkent qalasynda usynyldy. Kan­dıdattar arasynda 97,7 paıyzy (127) ózin ózi usynýshylar, al 2,3 paıyzyn (3) máslıhattar usynǵan.

Kandıdattardyń ortasha jasy 50,5 jasty quraıdy. Eń jas úmitker – 30 jas­ta, úmitkerler arasyndaǵy eń eresegi – 74 jasta. Úmitkerlerdiń 33-i – áıel. Áıel úmitkerler sany ótken saılaýda, ıaǵnı 2020 jyly – 19, 2017 jyly – 13, 2014 jyly 5 úmitker bolǵan.

Mamandyqtary boıynsha atap óter bolsaq: 22 – ınjener, 21 – ekonomıst, 21 – pedagog, 18 – zańger, 15 – agrarlyq sala qyzmetkerleri, 5 – dáriger, 2 – jýrnalıst, 3 – saıasattanýshy jáne 23 basqa mamandyq ıeleri.

Kandıdattar arasynda 36 kommer­sııalyq qurylymdardyń qyzmetkeri; 27 memlekettik uıymdardyń, kásiporyndar men mekemelerdiń qyzmetkeri; 48 mem­lekettik qyzmetshi, 9 qoǵamdyq uıymdardyń ókilderi, 2 zeınetker jáne 3 jumyssyz úmitker bar.

Qazirgi ýaqytta Parlament Sena­tynyń depýtattyǵyna kandıdattardy tirkeý úderisi júrip jatyr, ol 24 jeltoqsanǵa deıin jalǵasady. Búginde saılaý komıssııalary 49 kandıdatty tirkedi. Sóz sońynda Konstantın Petrov Parlament Senatynyń depýtattyǵyna kandıdattardy tirkeý qorytyndylary Ortalyq saılaý komıssııasynyń jeke otyrysynda qaralatynyn atap ótti.

Ortsaılaýkom múshesi Sábıla Mustafına óz baıandamasynda memleket kandıdattarǵa buqaralyq aqparat quraldarynda óz baǵdarlamalaryn jarııalaý úshin teń qarajat bólinýine kepildik beretinin atap ótti. Teledıdarda (tikeleı efırde nemese jazbada) – on bes mınýt; radıoda – on mınýt; merzimdi baspa basylymdarynda nemese jelilik basylymdarda 0,1 baspa tabaqtan aspaıtyn eki maqala jarııalaýǵa múmkindik beriledi.

Kandıdattar ózderiniń saılaý aldyn­daǵy baǵdarlamalarymen sóz sóıleý úshin memleket bólgen qarajat sheńberinde baspa nemese jelilik basylymdardaǵy, tele, radıoarnalardaǵy jarııalanymdar kólemin ózderi bóledi. Sondaı-aq respýblıkalyq bıýdjet qarajatynan kandıdattardyń saılaý aldyndaǵy jarııa is-sharalaryn ótkizýge, úgit materıaldaryn shyǵarýǵa arnalǵan shyǵystary men kólik shyǵystary Ortalyq saılaý komıssııasy belgilegen mólsherde óteledi.

Joǵaryda baıandalǵannyń negizinde OSK óz qaýlysymen Qazaqstan Res­pýblıkasy Parlamenti Senatynyń depý­tattyǵyna kandıdattyń respýb­lıka­lyq bıýdjet qarajatynan qarastyrylatyn shyǵyn 550 myń teńge kóleminde bel­giledi. Teledıdardan, radıodan sóıleýi jáne merzimdi ba­sylymdarda 2 maqala jarııalaýy úshin – 400 myń teńge; saılaý aldyn­daǵy jarııa is-sharalardy ótkizý jáne úgit materıaldaryn shyǵarýy úshin – 70 myń teńge; kólik shyǵyny úshin 80 myń teńge belgilendi.

Sondaı-aq S.Mustafına «Qazaqstan Respýblıkasyndaǵy saılaý týraly» Kons­tı­týsııalyq zańnyń 34, 75-baptary­na sáıkes Parlament Senatynyń depý­tat­tyǵyna kandıdattyń árbiri saılaý qoryn qurýǵa quqyly ekenin atap ótti.