Fýtboldan Qazaqstan ulttyq quramasy men Almatynyń «Qaırat» klýbynyń qorǵaýshysy Nuráli Álip Reseıdiń toǵyz dúrkin chempıony – «Zenıt» komandasymen eki jarym jyldyq kelisimshartqa qol qoıdy.
Bıyl Aqtaý fýtbol mektebiniń túlegi Nuráli Álipti Sankt-Peterbýrg klýby jalǵa alǵan edi. Osy ýaqyt aralyǵynda jerlesimiz «Zenıtpen» birge fýtboldan Reseı chempıonatynyń jeńimpazy jáne Sýperkýbok ıegeri atandy. Sondaı-aq ol reseılik klýb sapynda 14 matchta alańǵa shyǵyp, bir oıynda sary qaǵazben jazalandy.
Sankt-Peterbýrg klýbynyń baspasóz qyzmeti taratqan málimetke súıensek, Qazaqstan quramasynyń ortalyq qorǵaýshysymen kelisimshart «2,5 +1» júıesi boıynsha jasalǵan.